के छ राप्रपाको गढमा चुनावी चहलपहल ?

२९ चैत, हेटौँडा । हेटौँडा उपमहानगरपालिका वडा नम्बर ६ लाई राप्रपाको गढ मानिन्छ । राप्रपाका केन्द्रीय अध्यक्ष कमल थापा, जिल्ला अध्यक्ष रामहरी न्यौपाने, ३ नम्बर क्षेत्रीय अध्यक्ष धु्रव सञ्जेल, हेटौँडा नगर अध्यक्ष गुरुप्रसाद सापकोटा हेटौँडा–६ कै हुन् । 
राप्रपाको हेटौँडा नगरमा बलियो उपस्थिति रहेको वडामध्ये यो वडा पनि पर्दछ । त्यसैले धेरैले हेटौँडा–६ मा राप्रपाको चुनावी चलहपहल के छ भन्ने चासो राखेका छन् । ६ नम्बर वडामा राप्रपाले अझै पनि आफ्नो उम्मेदवार चयन गर्न सकेको छैन । वडा सभापति केदार राई र नगर सभापति गुरुप्रसाद सापकोटामध्ये को अध्यक्षको उम्मेदवार बन्ने भन्ने चर्चा वडामा छ ।
प्रतिकुल अवस्थामा नगरमा राप्रपाको उपस्थिति बढाउन महत्वपूर्ण भुमिका निर्वाह गरेका सापकोटा मेयरको आकांक्षी थिए । तर पार्टीबाट उनलाई मेयरको उम्मेदवार बनाउन नसक्ने अवस्था आएपछि वडा अध्यक्षको उम्मेदवार बनाउने कि भन्ने छलफल पार्टीबृत्तमा छ । वडा अध्यक्ष राईलाई उम्मेदवार बनाउनुपर्ने दवाव वडास्तरबाट जिल्ला पार्टी तहमा परेको छ । राई समुदायको बाक्लो उपस्थिति, इमान्दार र कार्यकर्तामा लोकप्रिय छवि भएका उनलाई उम्मेदवार बनाउँदा राप्रपाले जित्ने वडा तहका कार्यकर्ताहरुको दावि छ । अध्यक्षबाहेक अन्य पदमा भने आन्तरिक सहमति भईसकेको राप्रपा स्रोतको भनाई छ ।
‘वडा अध्यक्षसहित सबै पदमा उम्मेदवारको छिनोफानो केही दिनमै हुन्छ ।’–उनले भने–‘सबैसँगको सल्लाहमा अवसर दिने हाम्रो तयारी छ ।’ दुबै लोकप्रिय र जनता कार्यकर्तामा भिजेको भन्दै राईले छिटै उम्मेदवारबारे पार्टीले निर्णय लिने बताए । कार्यकर्ताहरु पुतलीबजारमा रहेको पार्टी कार्यालयमा जम्मा भएर पार्टीका उम्मेदवारलाई विजयी गराउनेबारे चर्चा परिचर्चा गर्ने गरेका छन् । राप्रपाको बाक्लो उपस्थिति भएपनि अहिलेसम्म अध्यक्ष जित्न नसकेकाले यसपटक खाता खोल्ने लक्ष्यका साथ राप्रपा नेता कार्यकर्ता जुट्ने जनाईएको छ । 
२०४६ सालपछि एक पटक नेपाली कांग्रेसको तर्फबाट विरेन्द्र मानन्धर र अर्को पटक नेकपा एमालेको तर्फबाट त्रिविक्रम मानन्धरले अध्यक्षमा जितेका छन् ।