बंशगोपाल २०५६ समूहका विद्यार्थीबाट राहतमा सहयोग

२ बैशाख, हेटौंडा । हेटौंडा-६ चौघडामा रहेको बंशगोपाल माध्यमिक विद्यालयका पूर्व विद्यार्थीहरुले हेटौंडा–६ को राहत वितरणमा आर्थिक सहयोग गरेका छन् । विद्यालयको 'एसएलसी २०५६ समूह' ले २५ हजार रुपैंया आर्थिक सहयोग गरेको हो ।
उनीहरुले सहयोग रकम विद्यालयमै पुगेर वडा अध्यक्ष अर्जुनप्रसाद चौलागाईलाई हस्तान्तरण गरेका छन् । आफु अध्ययन गरेको विद्यालय र सामाजिक हितमा सहयोग गर्ने उद्धेश्यले समूह बनाइएको बताउँदै सहयोग हस्तान्तरण गरेका विद्यासागर दुलालले एसएलसी २०५६ समूहको सहयोगले लकडाउनबाट दैनिक रोजिरोटी खोसिएर छाक टार्न समस्या परेका श्रमिक र विपन्न वर्गलाइ राहत उपलव्ध गराउन टेवा पुग्ने बताए ।
सहयोग रकम बुझ्दै अध्यक्ष चौलागाईले बंशगोपालका पूर्व विद्यार्थीहरुको सहयोगलाई वडाका ज्यालादारी श्रमिक र विपन्न वर्गको राहत वितरणमा सदुपयोग गर्ने बताउँदै सहयोग उपलव्ध गराएकोमा समूहलाई धन्यवाद दिए ।
कार्यक्रममा वडा सदस्य राजकुमार बास्तोला, रामहरी राई, कल्पना विश्वकर्मा, २०५६ समूहका विद्यासागर दुलाल, त्रिभुवनपति भास्कर थापा, चाँदनी मानन्धर, मनोज गौतम, खिलप्रसाद सापकोटा, भवनाथ गौतम, वडाका राजनैतिक दलका प्रतिनिधि लगायतको सहभागिता रहेको थियो ।