मकवानपुरमा हिरा लुटपाटमा संलग्न प्रहरी र पत्रकार जेल चलान

६ बैशाख, हेटौंडा । मकवानपुरमा हिरा लुटपाटको अभियोगमा पक्राउ परेका ३ प्रहरी र एक पत्रकार जेल चलान भएका छन् । उनीहरुलाई मकवानपुर जिल्ला अदालतले शुक्रबार पुर्पक्षका लागि जेल चलान गरेको हो । 
न्यायाधिश डिल्लीरत्न श्रेष्ठको एकल इजलासले प्रहरी समेत रहेका सुर्खेत बीरेन्द्रनगर १२ का २६ बर्षीय सुरेन्द्र बसेल, जाजरकोट शिवालय–२ का २७ बर्षीय बीरबहादुर बस्नेत, दाङको साविक सिउजा गाविस वडा नम्बर २ बस्ने २८ बर्षीय हिमकान्त पुन मगर र पत्रकार समेत रहेका ललितपुर महानगरपालिका भैसेपाटी बस्ने १९ बर्षीय सुजन आचार्यलाई पुर्पक्षका लागि थुनामा पठाएको छ ।  उनीहरु भीमफेदी कारागार चलान भएका छन् । प्रहरी प्रधान कार्यालयले तीनैजना प्रहरीलाई निलम्बन गरिसकेको छ । 
त्यस्तै, अदालतले थाहा नगरपालिका वडा नम्बर ४ का अमृत थिङलाई २५ हजार धरौटी तारेखमा रिहा गरेको छ । उनी हिरा लुटिएकी मकवानपुर कैलाश गाउँपालिका वडा नम्बर ५ चौकिटार गोगनेकी धनलक्ष्मी गुरूङका ज्वाई हुन् । उनले नै हिराबारे प्रहरी र पत्रकारको टोलीलाई जानकारी दिएका थिए । हिराबारे थाहा पाएपछि गुरुङको घरमा हिरा खरिद गर्ने बहानामा पुगेका प्रहरी र पत्रकारको टोलीले चैत ९ गते साँझ हिरा लुटपाट गरेका थिए । हिरा लुटिएको खबरपछि खटिएको ईलाका प्रहरी कार्यालय पालुङको टोलिले उनीहरूलाई पक्राउ गरेको थियो । 
चैत १० गते जिल्ला प्रहरी कार्यालयमा भएको पत्रकार सम्मेलनमा प्रहरीले लुटपाटमा संलग्न र उनीहरूको साथबाट हिरा बरामद ६१.६० क्यारेट एक थान, लोड अवस्थामा रहेको पेस्तोल एक थान, सञ्चारसेट ४ थान, क्यामरा १ थान, मेटल डिटेक्टर १ थान, मोबाइल ६ थान, ल्यापटप १ थान र लुटपाटमा प्रयोग गरेको प्रदेश–३–०१–०१–००२२ च ३३६२ नम्बरको कार समेत सार्वजनिक गरेको थियो । पक्राउ परेका उनीहरूलाई चोरी तथा डाकामुद्धा अन्तरगत मुद्धा ण्अघि बढेको छ ।
यो पनि पढ्नुस्
हिरा लुट्ने प्रहरी र पत्रकार मकवानपुरबाट पक्राउ