कोरोनाः अमेरिकामा एकैदिन २५ सय बढीको मृत्यु 

६ बैशाख, हेटौंडा । विश्वव्यापी महामारीको रुपमा फैलिरहेको कोरोना भाइरस अर्थात कोभिड १९ को मार खेपिरहेको अमेरिकामा संक्रमणबाट एकैदिन २ हजार ५ सय ३५ जनाको ज्यान गएको छ । 
विश्वका सबैभन्दा बढी मानिसको मृत्यु भएको अमेरिकामा यो सँगै कुल मृत्यु हुनेको संख्या ३७ हजार १ सय ५४ पुगेको छ । 
कोभिड १९ को तथ्याङक प्रस्तुत गरिरहेको वल्डोभिटर वेबसाइटका अनुसार अहिलेसम्म अमेरिकामा ७ लाख ९ हजार ७ सय ३५ जना कोरोना भाइरसबाट संक्रमित भएका छन् । यहाँ १३ हजार ५ सय ९ जनाको अवस्था गम्भिर रहेको छ ।
पछिल्लो २४ घण्टामा मात्रै यहाँ ३२ हजार १ सय ६५ जना नयाँ संक्रमित थपिएका छन् । यस्तै अमेरिकामा ६० हजार ५ सय १० जना उपचारपछि स्वस्थ्य भएका छन् । 
अमेरिकाका पचास वटै राज्यमा कोरोना संक्रमण फैलिएकोमा न्युयोर्क राज्य सबैभन्दा बढी प्रभावित भएको छ । यहाँ अहिलेसम्म २ लाख ३३ हजार ९ सय ५१ जना संक्रमित भएका छन भने १७ हजार १ सय ३१ जनाको ज्यान गएको छ । न्युयोर्कमा एकैदिन ७ हजार ७ सय ५३ जना नयाँ संक्रमित थपिएका छन् ।
यसैगरी अमेरिकाको दोस्रो प्रभावित राज्यमा न्यूजर्सी रहेको छ । यहाँ ७८ हजार ४ सय ६७ जना संक्रमित भएका छन भने ३ हजार ८ सय ४० जनाको मृत्यु भएको छ । 
यस्तै अमेरिकाको मासाचुसेटमा ३४ हजार ४ सय २ जना संक्रमित छन भने १ हजार ४ सय ४ जनाको मृत्यु भएको छ । 
यसैगरी अमेरिकाका अन्य राज्यहरु मिचिगनमा २ हजार २ सय २७, लुसियानामा १ हजार २ सय १३,  क्यालिफोर्नियामा १ हजार ४१, इलिनोइसमा १ हजार १ सय ३४, कनेक्टिकटमा १ हजार ३६, पेन्सिलभानियामा ९ सय ५७ जनाको मृत्यु भईसेकेको छ । 
कोरोना भाइरसको संक्रमणबाट अमेरिकाका अन्य राज्यमा पनि मृतक र नयाँ संक्रमितको संख्या तिब्र गतिमा बढीरहेको छ ।