रौतहट र बारामा हावाहुरी,असिनापानीको ताण्डव

शुक्रबार रातिको हावाहुरी र असिनापानीले क्षती पुगेको मनहरी –५ डिल्लीपुरको मकैखेती र घर

 ६ बैशाख, कोल्हवी ।शुक्रबार हावाहुरी सहित आएको असिनापानीले रौतहट र बारामा ठुलो क्षति पुगेको छ भने जिल्लाको अधिकांश स्थानमा रुख ढल्नुका साथै विद्युत आपूर्ति बन्द भएको छ । 
रौतहटको गरुडा,चन्द्रपुर, मौलापुर, कटहरीया, फतुवा विजयपुर र बाराको निजगढ, कोल्हवी, सिमरा,बरियारपुर, जितपुर लगायतका स्थानमा आएको हावाहुरी र असिनापानीले बाली नोक्सान गर्नुका साथै विद्युत आपूर्ति बन्द भएको छ ।हावाहुुरीले मौलापुर नगरपालिका–५ का शुुभनारायण तिवारी, देवाहीगोनाही नगरपालिका– ४ का कप्तान पटेल र बंकुल चौकस्थित जगदम्बा ट्रेडर्सको घरको छाना उडाएको छ । त्यसैगरी बौधीमाई नगरपालिका अन्तर्गत सरमुजवा गाँउमा झण्डै ३ दर्जन गोठ तथा कच्चीघरको छाना उडाएको छ ।हावाहुुरीका कारण मौलापुर,देवाहीगोनाही,बौधीमाई नगरक्षेत्र अन्तरगत ३ दर्जनभन्दा बढी विद्युत् पोल र दर्जनौँ रुख ढलेको देवाही गोनाहीकी उपमेयर परनिया देवी पटेलले जानकारी दिएकी छिन । 
त्यसैगरी गएरातीको हावाहुरी र असिनापानीले बाराको कोल्हवी र आसपासका क्षेत्रमा असिनापानीले लगाएको तरकारी र अन्न्बालीमा क्षेती पुगेको इलाका प्रहरी कार्यालय कोल्हवीले जनाएको छ । हवाहुरीका कारण निजगढ, पिलुवा, डुमारवाना लगायतका स्थानमा रुख ढलेका र विद्युत आपूर्ति बन्द भएको बारा प्रहरीले जनाएको छ । 

                हावाहुरीले सशस्त्रको ब्यारेक भत्किँदा ४ प्रहरी घाइते 
शुक्रवार राति आएको भीषण हावाहुरीले सशस्त्र प्रहरीको ब्यारेक भत्किँदा एकजना हवल्दारसहित ४ जना प्रहरी घाइते भएका छन् ।भारतीय सीमानासंगै जोडिएको बोर्डर आउट पोष्ट बंकुलस्थित सशस्त्र बस्ने ब्यारेक  भत्किँदा एकजना हवलदार सहीत ४ जना प्रहरी घाइते भएका हुन् ।
घाइते हुनेमा सशस्त्र प्रहरी हवलदार जंगबहादुर दराई, प्रहरी जवानहरु धिरेन्द्र साह कलवार, बिरेन्द्र साह कानु र प्रथलाल श्रेष्ठ रहेको रौतहट प्रहरीले जनाएको छ । उनिहरुको स्थानीय अस्पतालमा उपचार भइरहेको र अवस्था सामान्य रहेको जनाइएको छ । 

्