आइतबारसम्म पिसिआर विधिबाट ८ हजार ८१ को परीक्षणः मन्त्रालय 

File Photo

७ बैशाख, हेटौंडा । आइतबारसम्म कोरोना भाइरसको संक्रमणको आशंकामा पिसिआर विधिबाट ८ हजार ८१ जनाको परीक्षण गरिएको छ । 
स्वास्थ्य तथा जनसंख्या मन्त्रालयले नियमित पत्रकार सम्मेलनमा आइतबारसम्म देशैभरमा गरी कुल ८ हजार ८१ जनाको पिसिआर विधिबाट परीक्षण गरेको जनानकारी दिएको हो ।
पत्रकार सम्मेलनमा बोल्दै मन्त्रालयका प्रवक्ता डा. विकास देवकोटाले आरडिटी विधिबाट २१ हजार ४ सय ८६ जनाको परीक्षण गरीएको जानकारी दिए ।
यस्तै डा. देवकोटाले पछिल्लो २४ घण्टामा मात्रै २१ सय ६८ वटा परीक्षण भएकौ जानकारी दिए । प्रदेशहरुमा परीक्षणका लागि थप किटहरु पठाइएको पनि बताए ।
भेरी अस्पतालमा पनि आइतबारबाट पिसिआर विधिबाट परीक्षण सुरु भएको छ । यो सँगै देशभरी १५ वटा अस्पतालबाट पिसिआर विधिबाट परीक्षण सुरु भएको प्रवक्ता देवकोटाले जानकारी दिए । यस्तै प्रवक्ता डा. देवकोटाका अनुसार भेरी अस्पतालमा अहिले ८ वटा नमुना परीक्षणको क्रममा रहेका छन् ।
सरकारले विभिन्न प्रदेशहरुबाट आएका रिपोर्टहरुलाई भेरिफाइ गर्न क्रस परीक्षण गरिरहेको जनाएको छ । पश्चिममा भेरी अस्पताल र पूर्वमा विपि कोइराला स्वास्थ्य विज्ञान प्रतिष्ठानमा अन्य अस्पतालबाट आएका रिपोर्टहरु पुनः परीक्षण गरिने र त्यहाँ पोजेटिभ देखिएमा मात्रै पुष्टि हुने प्रवक्ता देवकोटाले बताए ।
क्वारेन्टाइनमा ५ हजार १ सय ८० जना रहेका छन् । उपत्यकामा ५ र बाहिर ९८ गरी १ सय ३ जना आइसोलेसनमा रहेका छन् । 
मन्त्रालयका अनुसार अहिलेसम्म नेपालमा ३१ जनामा कोरोना पोजेटिभ देखिएको छ । अहिले २७ जना उपचाररत रहेका छन् । 
शनिबार उदयपुरमा एकजनामा कोरोना पोजेटिभ देखिएसँगै संक्रमितको संख्या ३१ पुगेको हो ।
मन्त्रालयका प्रवक्ता देवकोटाले आइतबार कैलालीको सेती प्रादेशिक अस्पतालमा उपचाररत २१ बर्षिय युवालाई डिस्चार्ज गरेसँगै उपचारपछि ४ जना संक्रमित निको भएर घर फर्किएको जानकारी दिए ।