नेपालमा प्रेस स्वतन्त्रताको अवस्था कमजारः प्रतिवेदन

११ बैशाख, हेटौंडा । नेपालमा प्रेस स्वतन्त्रताको अवस्था गतवर्षभन्दा ६ स्थान तल झरेको छ । रिपोर्टर्स विथाउट बोर्डर्सले सार्वजनिक गरेको प्रतिवेदनमा नेपालमा प्रेस स्वतन्त्रताको अवस्था कमजोर देखाएको हो ।
विश्व प्रेस स्वतन्त्रता सूचकांकमा गत वर्ष १०६ औं स्थानमा रहेको नेपाल यस बर्ष ११२ औं स्थानमा रहेको प्रतिवदेनमा उल्लेख गरिएको छ । 
विश्वभरका १८० देशमा गरिएको अनुगमनमा नेपाल ११२ औं स्थानमा परेको हो ।
विश्व प्रेस स्वतंत्रता सूचकांक २०२०ः प्रतिवेदनमा विपक्षमा रहँदा नेपाली प्रेसको प्रशंसा गर्ने प्रधानमन्त्री केपी ओलीले आफू प्रधानमन्त्री भएलगत्तै संसदबाट निकै कठोर कानून पारित गर्न खोजेको उल्लेख गरिएको छ ।
खोजी पत्रकारिताका लागि अवरोध गर्ने खालको नयाँ अपराध संहिता लागू गरिएको भन्दै रिपोर्टर्स विथाउट बोर्डर्सले सरकारले तोकेको मानिसलाई सिधै नियुक्ति दिने प्रावधानसहितको प्रेस काउन्सिल ऐन बनाउन खोजेको पनि जनाएको छ ।
सरकारका मन्त्री र अधिकारीहरु सञ्चारमाध्यमको विरोधमा लागेको भन्दै प्रतिवेदनमा सरकारी नियन्त्रणमा रहेका पत्रिका, रेडियो र टिभी च्यानलको प्रयोग हुन थालेको पनि उल्लेख गरेको छ ।
विभिन्न धम्की, हिंसालगायतका कारण स्वतन्त्र रुपमा पत्रकारिता गर्नेहरुका लागि नेपालको वातावरण कठिन हुँदै गएको पनि प्रतिवेदनमा उल्लेख गरिएको छ ।
दक्षिण एशियामा भारत १४२, पाकिस्तान १४५, बंगलादेश १५१ रहेको छ । नर्वे लगातार चौथो वर्ष पनि पहिलो स्थानमा रहँदा उच्च पाँच देशमा क्रमशः फिनल्याण्ड, डेनमार्क, स्वीडेन, नेदरल्याण्ड रहेका छन् । बेलायत ३५ औं स्थानमा रहँदा अमेरिका ४५ औं स्थानमा रहेको छ ।
खराबतर्फको सूचीका उच्च पाँचमा उत्तर कोरिया, तुर्कमेनिस्तान, इरित्रिया, चीन र दिजिबुटी रहेका छन् । फोटोः गुगल