कोरोना रोकथामका लागि स्वास्थ्यकर्मीको टोली स्थानीय निकायमा पठाईने 

File Photo

१२ बैशाख, हेटौंडा । कोरोना भाइरस रोकथाम तथा नियन्त्रणका लागि ट्रेसिङ र टेस्टिङ कार्यमा सहजिकरण गर्न भन्दै सरकारले स्थानीय निकायमा खटाउने गरी टोली गठन गरेको छ ।
स्वास्थ्य तथा जनसंख्या मन्त्रालयले आयोजना गरेको नियमित पत्रकार सम्मेलनमा मन्त्रालयका प्रवक्ता डा. विकास देवकोटाले स्थानीय तहमा हुने ट्रेसिङ तथा टेस्टिङ कार्यमा सहजिकरण गर्न तीन सदस्यीय स्वास्थ्यकर्मीहरुको समूह गठन गरिएको जानकारी दिए ।
उनले हरेक स्थानीय तहमा खटाउने गरी समूह गठन गरिएको उल्लेख गर्दै उक्त समूहमा जनस्वास्थ्य अधिकृत, ल्याब प्रयोगशालाको कर्मचारी, प्यारामेडिक्स वा नर्स एक÷एक जना रहने बताए । 
हरेक गाउँपालिकामा एक समूह, नगरपालिकामा २ समूह, उपमहानगरपालिकामा ३ समूह र महानगरपालिकामा ५ वटा समूहका दरले खटाइने प्रवक्ता डा. देवकोटाको भनाई छ । 
यस्तै प्रवक्ता देवकोटाले शुक्रबार कोरोना भाइरस संक्रमण भएका कुनैपनि नयाँ बिरामी नथपिएको बताए । उनले प्रदेश नम्बर एकमा परीक्षणको दायरालाई बढाइएपनि नयाँ संक्रमण फेला नपरेको जानकारी दिए । 
प्रवक्ता डा. देवकोटाका अनुसार अहिलेसम्म पीसीआर प्रविधिबाट ९ हजार ४ सय ७ जनाको परीक्षण भएको छ । यस्तै आरडिटी विधिबाट ३८ हजार ८९ परिक्षण गरिएको छ । 
यससँगै कोरोना भाइरस परीक्षण गरिएको कुल संख्या ४७ हजार ४ सय ९६ पुगेको प्रवक्ता देवकोटाले जानकारी दिए । पछिल्लो २४ घण्टामा ३ हजार ७ सय ९१ नयाँ परीक्षण भएको उनको भनाई छ ।
अहिले सम्म कुल संक्रमित ४८ जना रहेकोमा १० जना निको भएर घर फर्किइसकेको, २८ जनाको अवस्था सामान्य रहेको र उनीहरुको उपचार चलिरहेको पनि प्रवक्ता डा. देवकोटाले जानकारी दिए ।