ज्वरोका विरामी देख्दा अस्पताल नै त्रसित

१५ बैशाख, हेटौंडा । १५ दिनदेखी ज्वरोले थलीएकी १० वर्षिया आफ्नी बहीनी नाजरिन खातुनको उपचारको लागि बीरगन्जको गण्डक अस्पताल पुगेका रियाज खान अस्पतालमा उनको उपचार नहुँदा निराश भए । 
गण्डक अस्पतालले आफुसंग आईसीयु नभएको भन्दै भरतपुर जान सल्लाह दिएपछि उनी बिरामी बहीनी बोकेर भरतपुर पुगे । 
त्याँहा पनि अस्पतालले ज्वरोको बिरामी भर्ना लिन नमाने पछि उनको निराशा झनै बढ्यो । भरतपुरका निजी र सरकारी अस्पताल सबै चहारेका खातुनलाई अस्पतालले रगतको अभाव, आईसीयु उपकरण नभएको बहाना बनाएर फिर्ता पठाएको उनी बताउँछन् । 
बिरामी बहीनी बोकेर घर फर्कन लाग्दा बिचमै हेटौँडा अस्पताल छिरेपछि भने अस्पतालले बहीनीको उपचारका लागि भर्ना लिदाँ उनी निक्कै खुसी भए । 
बिरामी बहीनीको उपचारका लागि ३ दीनसम्म विभिन्न अस्पताल धाउँदा हेटौँडा अस्पतालले भर्ना लिईदिए पछि भने उनी ढृुक्क देखीएका छन् । उनले हेटौंडा अस्पताल प्रशासन र यहाँका चिकीत्सकहरुले देखाएको मानवीयताको प्रसंसा नै गरे । 
पर्सा जिल्ला कालीमाई गाउँपालिकाका–२ की १० बर्षीया नाजरिन खातुनलाई अहीले हेटौंडा अस्पतालले भर्ना लिएर उपचार गरिरहेको छ । 
उनको शरीरमा प्लेटलेट्स, डब्लुबिसी निकै कम भैसकेको थियो । उपचारमा संलग्न डाक्टर राजु सेढाँईका अनुसार उनलाई एप्लाष्टिक एनेमिया भएको छ । नाजरिनको शरीरमा रगत उत्पादन नभएको र रगतमा हेमोग्लोबिन, प्लेटलेट्सको कमी भएको डाक्टर सेढाइ बताउँछन् । 
विश्वव्यापी रुपमा फैलिएको कोरोनाको त्रासले अस्पतालले ज्वरोका विरामी भर्ना नै लिन नचाहाँदा बिरामी र उनका आफन्तले शारीरिक र मानसिक पीडा भोगीरहेका छन् । 
यो विषम परिस्थीतीमा बिरामीकै औषधि उपचारका लागी खोलीएका निजी र सरकारी अस्पतालबाट उपचार सेवा नपाउने वातावरणको अन्त्य गर्न सरकारले तदारुकता देखाउन जरुरी छ ।