मन्त्रीमा मकवानपुरका ३ को चर्चा

११ साउन, हेटौँडा । राष्ट्रपति विद्यादेवि भण्डारीले सरकार गठनका लागि आव्हान गरेसँगै नयाँ सरकार गठनको बाटो खुलेको छ । नेपाली काँग्रेस–नेकपा माओवादी केन्द्र सरकारमा सहभागी हुने मन्त्रीहरुको नामावली तयार गर्न व्यस्त छन् । केन्द्रमा नामावली तयार भईरहँदा मकवानपुरमा पनि नयाँ मन्त्री बन्नेमा ३ जनाको नाम चर्चामा छ । 
जिल्लाका राजनैतिक दलका नेता, कार्यकर्ता अहिले मन्त्री बन्नेको लाईनमा नेपाली काँग्रेसका २ र नेकपा माओवादी केन्द्रका एकजना सांसदको नामबारे चर्चा गरिरहेका छन् । चर्चामा रहेका सांसदमा नेपाली काँग्रेसको तर्फबाट पूर्व केन्द्रिय सदस्य महालक्ष्मी डिना उपाध्याय र जिल्ला सभापति इन्द्रबहादुर बानियाँ छन् भने माओवादी केन्द्रको तर्फबाट रामनारायण विडारी छन् । चर्चामा रहेका मध्ये बानियाँ प्रत्यक्ष निर्वाचित हुन् भने विडारी र उपाध्याय समानुपातिकतर्फका हुन् । उपाध्याय पूर्व जलस्रोत राज्यमन्त्री हुन् भने नयाँ संविधान निर्माणका क्रममा विडारी मस्यौदा समितिमा थिए ।

मन्त्री बन्ने चर्चामा विडारीको नाम कानूनमन्त्रीमा छ भने उपाध्याय र बानियाँको खुलेको छैन । माओवादी केन्द्रनिकट एक नेताका अनुसार खिमलाल देवकोटा नयाँ शक्तिमा गएपछि विडारी जत्तिको कानूनका जानकार माओवादीमा नरहेकाले उनी मन्त्री बन्ने प्रायः निश्चित छ । विडारी अहिले प्रचण्डका विश्वासपात्र मध्येका एक भएकाले पनि उनी मन्त्री बन्ने विडारीलाई नजिकबाट चिन्ने जिल्लाका राजनीतिककर्मीहरु बताउँछन् । उपाध्याय र बानियाँमध्ये एकजना मात्रै मन्त्री हुने वा दुबै मन्त्री हुने सम्भवनाबारे समेत राजनीतिक वृत्तमा चर्चा छ ।

काँग्रेस महाधिवेशनमा केन्द्रिय सदस्यमा खुल्लातर्फ चुनावमा हारेकी डिनालाई व्यवस्थापन गर्न देउवाले मन्त्री बनाउने चर्चा एक थरीको छ भने मकवानपुरमा काँग्रेसको तर्फबाट खाता खोलेका र धेरैको भरोसा बनेको पार्टीमा रिर्पोटिङ रहेकाले बानियाँलाई मन्त्री बनाउनुपर्ने आवाज केन्द्रमा बलियो रहेको अर्का थरी बताउँछन् । तीनैजना नेता मन्त्री बन्नका लागि आफ्नो पक्षमा जिल्लातहदेखि केन्द्रिय तहसम्मका च्यानल प्रयोग गरी नेतालाई दवाव सिर्जना गरिरहेका छन् । चर्चामा रहेका तीनमध्ये कसको पक्षमा पल्ला भारी हुने हो त्यो भने केही दिनमा बाहिर आउने छ ।