ज्योतिले शुरु गर्यो अनलाईन शिक्षण, विद्यार्थी खुशी

१७ बैशाख, हेटौंडा । हेटौंडा–१८ हर्नामाडिमा रहेको ज्योती माबिले अनलाईन शिक्षण शुरु गरेको छ । एक महिनादेखि जारी लकडाउनका कारण विद्यार्थीको अध्ययन प्रभावित भएपछि विद्यालयले अनलाईन शिक्षण शुरु गरेको हो ।
विद्यालयले पहिलो चरणमा कक्षा ८ देखी १२ सम्मको कक्षा संचालन गरिरहेको प्रधानाध्यापक जयराम थापाले बताए । अभिभावक र विद्यार्थीसंगको समन्वयमा अन्य कक्षा पनि संचालन गर्ने थापाको भनाई छ । विद्यालयको अनलाईन शिक्षण प्रक्रियालाई शिक्षकहरुले समेत साथ दिएका छन् । कोरोना भाईरस संक्रमणको त्रास र लकडाउनका कारण बालबालिकाहरुमा शैक्षिक  तथा मानसिक रुपमा अप्ठ्यारो स्थिति नआओस् भनेर अनलाईन शिक्षण शुरु गरेको बिद्यालयका सहायक प्रधानाध्यापक भुपेन्द्र चौलागाइले जानकारी दिए ।
शैक्षिक सत्र ०७६/०७७ को बार्षिक परिक्षा अचानक रोकिएपछि विद्यार्थीहरु अन्यौलमा रहेको बताउँदै उनले यसको तयारीका लागि समेत ध्यानमा राखी अनलाईन बिधि अपनाइएको उनको भनाई छ । नियमित रुटिन बनाइ कक्षा संचालन गरिने चौलागाईले बताए ।
अनलाईन शिक्षणप्रति विद्यार्थीहरु पनि उत्साही देखिएका छन् । ‘अनलाईनबाटै भएपनि कक्षा संचालन भएपछि परीक्षाको तयारी सहज भएको छ ।’–एसईई तयारी गरिरहेकी सन्चिता पाठकले भनिन् । विद्यालय बन्द भएपछि घरमा खाली बसिरहेका विद्यार्थीलाई अनलाईनमार्फत अध्ययन गराएर विद्यालयले विद्यार्थीहरुको भविष्यलाई ख्याल गरेको भन्दै  अभिभावक सानुभाइ कार्कीले शिक्षकहरुप्रति आभार व्यक्त गरे । 
शिक्षकहरुको अग्रसरताले विद्यालयको शैक्षिक गतिविधिमा टेवा पुगेको भन्दै विद्यालय व्यवस्थापन समितिका अध्यक्ष हर्क रम्तेलले यसलाई अन्य समयमा पनि निरन्तरता दिनु आवश्यक रहेको बताए । लकडाउनको समयमा विद्यार्थीहरु घरमा बरालिएर बसेको अवस्थामा अनलाईन शिक्षण प्रभावकारी हुने उनको विश्वास छ । उनले शिक्षण पद्धतिका लागि प्रयोग हुने इन्टरनेट शुल्कमा सहुलियत दिए अझ अनलाईन शिक्षणलाई अघि बढाउन सहज हुने बताए ।