राप्रपामा नगएको वाईसीएल अध्यक्ष राईको प्रष्टिकरण

८ बैशाख, हेटौंडा । नेकपा माअोवादी केन्द्रको भातृसंगठन वाइसीएल ६ नम्बर अध्यक्ष राजकुमार राईले अाफु राप्रपामा नगएको प्रष्ट पारेका छन् ।

माअोवादी केन्द्रले चौघडामा शुक्रबार गरेको पत्रकार सम्मेलनमा उनले अाफु राप्रपा नगएको प्रष्ट पारेका हुन् । अाफुलाई सांस्कृतिक कार्यक्रम हेर्न जाउँ भनी लगेको र प्रवेशको लिष्टमा अाफ्नो नाम जबर्जस्ती राखेर प्रचार गरेको भन्दै राईले अापत्ति व्यक्त गरे । बंशगोपाल क्याम्पस स्ववियु सचिव र अखिल क्रान्तिकारीका जिल्ला सदस्य समेत रहेका राईले भ्रमको खेती नगर्न समेत राप्रपालाई चेतावनी दिए ।

पत्रकार सम्मेलनमा बोल्दै वडा ईन्चार्ज बालकृष्ण चौलागाईंले पार्टीमा रहेका कैयौं युवाले राप्रपा छोड्दै गएको अवस्थामा छलकपटको खेल खेलेको भन्दै यस्तो नगर्न राप्रपालाई सुझाव दिए । राप्रपाले जवरजस्ति पार्टी प्रवेश घोषणा गरेपछि राईले माअोवादी केन्द्रमा गुनासो गरेकाले पत्रकार सम्मेलन गरेर विषयबस्तुबारे प्रष्ट पार्नु परेको चौलागाईंले बताए । कार्यक्रममा केन्द्र वडा अध्यक्ष ईन्द्रमणि गौतमसहित स्थानीय नेता कार्यकर्ताको सहभागिता रहेको थियो ।

राप्रपाले विहिबार हेटौंडामा भएको चुनावी सभामा राईसहितका युवा पार्टी प्रवेश गरेको जनाएको थियो ।