कोरोनाको आशंकामा १२ हजार ५ सय बढी पीसीआर परीक्षण

१९ बैशाख, हेटौंडा । अहिलेसम्म कोरोना भाइरसको संक्रमणको आशंकामा नेपालमा पीसीआर प्रविधिबाट १२ हजार ५ सय ७७ नमुना परीक्षण भएको स्वास्थ्य तथा जनसंख्या मन्त्रालयले जनाएको छ ।
परीक्षण गरिएका मध्ये अहिलेसम्म ५९ जनामा संक्रमण भेटिएको छ । १६ जना उपचारपछि निको भएका छन् भने बाँकीको उपचार चलिरहेको छ ।
यस्तै आरडिटी विधिबाट कुल ४७ हजार ७ सय ९७ परीक्षण भएको छ । पछिल्लो २४ घण्टामा १ हजार ४ सय ६१ परीक्षण भएको छ । 
अहिलेसम्म प्रदेश नम्बर १ मा ५ हजार ८९, प्रदेश नम्बर २ मा ५ हजार ६ सय १७, बागमती प्रदेशमा ८ हजार ४ सय ९४ परीक्षण भएको छ ।
यसैगरी गण्डकी प्रदेशमा ५ हजार ४ सय ११, प्रदेश ५ मा ४ हजार ३५, कर्णाली प्रदेशमा ५ हजार ५ सय ६७ र सूदुरपश्चिम प्रदेशमा १३ हजार ५ सय ८४ वटा आरडिटी परीक्षण भएको मन्त्रालयका प्रवक्ता डा. बिकास देवकोटाले जानकारी दिएका छन् ।
देशभर क्वारेन्टाइनमा रहेका मानिसहरुको संख्या २४ हजार ९ सय ७ रहेको छ । जसमध्ये प्रदेश नम्बर १ मा २ हजार ८ सय ७७, प्रदेश नम्बर २ मा १ हजार ३ सय ३२ रहेको छ ।
यस्तै बागमती प्रदेशमा ५ सय ३८, गण्डकी प्रदेशमा ७ सय ८, प्रदेश नम्बर ५ मा १२ हजार १ सय ६३, कर्णाली प्रदेशमा ३ हजार ७ सय २४ र सूदुरपश्चिम प्रदेशमा ३ हजार ५ सय ६५ जना क्वारेन्टाइनमा रहेका छन् । 
मन्त्रालयका अनुसार देशभर आइसोलेसनमा रहेका व्यक्तिको संख्या ९४ रहेको छ भने ५ जना काठमाडौंमा र ८९जना उपत्यका बाहिरका अस्पतालहरुमा रहेका छन् ।