मकवानपुरमा लकडाउनमा बालविवाहको प्रयास, १०९८ मा आएको फोनले रोकियो

सांकेतिक तस्विर

२० बैशाख, हेटौंडा । कोरोना संक्रमणको जोखिम रोक्न सरकारले गरेको लकडाउनकै बीचमा मकवानपुरमा बालविवाहको प्रयास भएको खुलेको छ । मकवानपुरको हेटौंडा नगरपालिका र नगरसंगै जोडिएको मकवानपुरगढी गाउँपालिकामा बालविवाहको प्रयास भएको हो । 
दुबै स्थानमा हुन लागेको बालविवाह सम्बन्धित क्षेत्रका वडा अध्यक्षको समन्वयमा रोकिएको सिविन बालहेल्प लाईन मकवानपुरले जनाएको छ । सिविनका अनुसार मकवानपुरको मकवानपुरगढी गाउँपालिका वडा नम्बर ७ र हेटौंडा उपमहानगरपालिका वडा नम्बर १४ मा बालविवाहको प्रयास भएको थियो । मकवानपुरगढि–७ की १४ बर्षीया बालिका र वडा नम्बर २ का  १७ बर्षीय बालकबीच बालविवाह हुन लागेको थियो । त्यस्तै, हेटौंडा–१४ की १५ बर्षीया बालिका र वडा नम्बर १३ का १९ बर्षीय बालकबीच बालविवाह हुन थालेको थियो । 
गढीको बालविवाह २ नम्बर वडा अध्यक्ष बखानसिंह पाख्रिनको अगुवाइमा गढि गाउँपालिका महिला तथा बालबालिका शाखा प्रमुख मन्दिरा थापा, बालहेल्पलाइनकी कार्यक्रम अधिकृत सम्झना, बालबालिकाका परिवारको रोहवरमा रोकिएको थियो । हेटौंडा–१४ मा अध्यक्ष दीपक खड्काको अगुवाइमा मयुरधाप अस्थायी प्रहरी वितका इन्चार्ज साजनकुमार शर्मा, सिविन बालहेल्पलाइन जिल्ला संयोजक झबिन्द्र ज्ञवाली, कार्यक्रम अधिकृत सम्झना अधिकारी र बालबालिकाका अभिभावकको रोहवरमा रोकिएको थियो । 
दुबै बालिकालाई थप परामर्शको केहि दिन बाल हेल्पलाईनकै संरक्षणमा राखिएको छ । सिविन नेपालद्वारा संचालित बालहेल्पलाइनको पैसा नलाग्ने फोन १०९८ मा बालविवाह हुन लागेकोको सूचना आएपछि बालविवाह रोक्न सफल भएको जनाईएको छ । बालहेल्पलाइनले  सन् २०२० जनवरी देखि हालसम्म २६ वटाबालविवाह रोक्न सफल भएको छ ।