मनहरी ५ का १३५ घरलाई युवाहरुले दिए राहत सामाग्री

२० बैशाख,हेटौँडा।मकवानपुरको मनहरी गाउँपालिका वडा नम्बर ५ मा युवाले राहत वितरण गरेका छन।डिल्लीपुरका स्थानीय युवा तथा समाजसेवीहरुको सक्रियतामा वडाका न्यूनवर्गीय परिवारलाई राहत वितरण गरिएको हो ।

स्थानीय शिवराज उप्रेती र योगेन्द्र अर्याल सहितको युवाहरुको सक्रियतामा शुक्रबार वडाको वसन्तपुर, रुन्चेडाँडा, दमार, रातोमाटेलगायतका क्षेत्रका गरी १ सय ३५ परिवारलाई राहत सामाग्री वितरण गरिएको हो । लकडाउनका कारण दैनिक काम ठप्प हुँदा बिहान बेलुका छाक टार्न मुस्किल भएका परिवारको पहिचान गरी आफूहरुले प्रति परिवार १३ किलो चामल, तेल, दाल, नुन, मसला, मस्यौरा लगायतका सामाग्री वितरण गरिएको उप्रेतीले बताए । 
नेपाली काँग्रेस हेटौंडा उपमहानगर सभापति आनन्दराम पराजुली, लोकतान्त्रिक खाद्यान्न संघ मकवानपुरका अध्यक्ष काव्यमणि अधिकारी, काँग्रेस युवा नेता राजेश भेटवाल, काँग्रेस नेता भरत पराजुली, प्रकाश वर्तौला, राक्सिराङ गाउँपालिकाका काँग्रेस युवा नेता नवराज लामा, नेपाल तरुण दल मकवानपुरका उपाध्यक्ष निराजन वर्तौलालगायतले उपलब्ध गराएका सहयोग वडा कार्यालयको सहकार्यमा वितरण गरेको उप्रेतीले बताएका छन । उक्त स्थानमा केही दिन अघि आएको हावाहुरीले करिब १ सय ५० घरको छाना उडाएको थियो भने असिनाले तरकारी तथा अन्नबालीमा नोक्सान पुयाएको थियो ।