काँग्रेसको हेटौंडाको थप ३ वडामा उम्मेदवार सर्वसम्मत

१३ बैशाख, हेटौंडा । नेपाली काँग्रेस ३ नम्बर क्षेत्रीय समितिले बुधबार हेटौंडा उपमहानगरको थप ३ वटा वडामा उम्मेदवारहरु सर्वसम्मत सिफारिश गरेको छ ।
३ नम्बर क्षेत्रीय सभापति तारानाथ चौलागाईको अध्यक्षतामा बसेको बैठकले हेटौंडाको ३, ११ र १९ नम्बर वडामा उम्मेदवार सर्वसम्मत गरिएको हो ।
हेटौंडा उपमहानगरपालिकाको ३ नम्बरमा अध्यक्ष ढलकबहादुर थापा, सदस्यहरु  सरोजराज ढकाल, अक्कलबहादुर पाख्रिन, महिला सदस्यमा रामकुमारी घलान र दलित महिला सदस्यमा सावित्री विश्वकर्मा सर्वसम्मत भएका छन् ।
त्यस्तै ११ नम्बर वडामा अध्यक्ष अर्जुन शर्मा कँडेल, सदस्यहरु विकाश नेपाल, गोकर्ण बर्तौला, महिला सदस्य शुभद्रा बर्तौला र दलित महिला सदस्यमा टक्कु बिक सर्वसम्मत उम्मेदवार भएका छन् । हेटौंडा १९ नम्बरमा अध्यक्षमा शालिकराम अधिकारी, सदस्यहरु मानबहादुर गोले, देवराज गोले, महिला सदस्य सरस्वती भण्डारी र दलित महिला सदस्यमा सरस्वती परियार सर्वसम्मत भएको ३ नम्बर क्षेत्रीय सचिव घनश्याम नेपालले जानकारी दिए । बैठकको निर्णय बुधबारै जिल्ला पार्टी कार्यालयलाई जानकारी गराइएको सचिव नेपालले बताए ।

हेटौंडा १७ मा चुनाव प्रचारप्रसार समिति
नेपाली काँग्रेसको चुनाव प्रचारप्रसार कार्यक्रम अन्र्तगत हेटौंडा १७ ठूलो गंगटेमा बुधबार चुनाव प्रचारप्रसार समिति गठन गरिएको छ ।
पार्टीका जिल्ला सल्लाहकार एवं १७ नम्बर वडाका अध्यक्ष उम्मेदवार दामोदर सुवेदीको सभाध्यक्षतामा भएको कार्यक्रममा अतिथिहरु क्षेत्रीय सचिव जनक धिताल, साविक हेटौंडा २० र २२ का वडा सभापतिहरु नवराज न्यौपाने र उद्धव सत्याल, तरुण नगर सचिव दीपक श्रेष्ठ, तरुण २० र २२ नम्बरका अध्यक्षहरु दीपक थापा र रमेश श्रेष्ठलगायतले मन्तव्य व्यक्त गरेका थिए ।
कार्यक्रममा ईन्द्रप्रसाद नेपालको संयोजकत्वमा १५१ सदस्यीय चुनाव प्रचारप्रसार समिति र रमेश श्रेष्ठको संयोजकत्वमा १५ सदस्यीय आर्थिक समितिसमेत गठन गरिएको छ ।