भोर नेपालबाट हेटौंडा-६ का सुत्केरीलाई ‘पोषण प्याकेज’ वितरण

२४ बैशाख, हेटौंडा । गैरसरकारी संस्था भोर नेपालले हेटौडा वडा नम्बर ६ का २२ जना सुत्केरीहरुलाई पोषण प्याकेज वितरण गरेको छ । 
संस्थाले बुधबार वडा कार्यालयको समन्वयमा पोषण प्याकेज वितरण गरेको हो । संस्थाले परोपकारी युवा संजाल नेपालको व्यवस्थापनमा विभिन्न व्यक्तिहरुबाट प्राप्त रकमबाट लकडाउनको समयमा सुत्केरीमा कुपोषणको जोखिम नहोस् भन्ने उद्धेश्यले पोषण प्याकेज वितरण गरेको संस्थाका राजकुमार महतोले बताए । प्याकेजमा चामल, तेल, गेडागुडी, अण्डा, तरकारी, फलफुल, भिटामिन ए क्याप्सुल, सेनेटरी प्याड लगायतका सामग्री रहेका छन् । प्याकेज वितरण कार्यक्रममा ६ नम्बर वडाका अध्यक्ष अर्जुनप्रसाद चौलागाई, वडा सदस्यहरु राजकुमार बास्तोला, रामहरी राई, शुभद्रा तिमल्सिना र कल्पना विश्वकर्मा, राजनैतिक दलका प्रतिनिधि, परोपकारी युवा संजाल नेपाल रमेश सापकोटा लगायतको सहभागिता रहेको थियो । 
सहयोगदाता महतोले सुत्केरीहरुलाई पोषण अत्यावश्यक भएकाले प्राप्त सामग्रीको पूर्ण सदुपयोगका लागि आग्रह गरेका थिए । ६ नम्बर वडाका अध्यक्ष अर्जुनप्रसाद चौलागाईले महतो र संस्थाले यसअघि पनि हेटौंडा ६ का श्रमिक र विपन्न परिवारलाई राहत उपलव्ध गराएको र अहिले पनि सुत्केरीलाई पोषण प्याकेज उपलव्ध गराएकोमा आभार व्यक्त गर्दै निरन्तर सहकार्यका लागि अनुरोध गरे । संस्थाले ७ वटै प्रदेशमा यस्तै पोषण प्याकेज वितरण गरिरहेको छ ।