एसईई परीक्षाको विकल्प खोजिदै

२९ बैशाख, हेटौंडा । माध्यामिक शिक्षा परीक्ष (एसईई) मा अनिवार्य विषयको राष्ट्रिय परीक्षा बोर्डले र ऐच्छिक विषयको सम्बन्धित विद्यालयले नै लिन पाउने व्यवस्थाका लागि प्रस्ताव गरिएको छ ।
कोरोना भाइरसका कारण रोकिएको एसईई, कक्षा ११ र १२ को परीक्षालाई पुनः कसरी सञ्चालन गर्न सकिन्छ भन्नेबारेमा अध्ययन गर्न गठित कार्यटोलीले शिक्षा, विज्ञान तथा प्रविधि मन्त्रालयसमक्ष यस्तो प्रस्ताव बुझाएको हो ।
शिक्षा पत्रकार सञ्जालले आइतबार आयोजना गरेको अनलाइन अन्तक्र्रियामा राष्ट्रिय परीक्षा बोर्डका अध्यक्ष तथा सो कार्यटोलीका संयोजक प्रा.डा. चन्द्रमणि पौडेलले परीक्षालाई सहजरूपमा सञ्चालन गर्न यस्तो प्रस्ताव बुझाइएको जानकारी दिएका छन् ।
उनले एसईई, कक्षा ११ र १२ को परीक्षा नहुने वा आन्तरिक मूल्यांकनका आधारमा प्रमाणपत्र जारी गरिने जस्ता भ्रम सुनिएको चर्चा गर्दै ती सबै गलत कुरा भएको प्रस्ट पारेका छन् । उनले कानुनले परीक्षा लिनुपर्दछ भनेको उल्लेख गर्दै कानुनभन्दा बाहिर कोही जान नसक्ने बताए । 
कोरोनाको महामारीबाट सुरक्षित छौं भनेर सरकारले घोषणा गरेपछि परीक्षा सञ्चालन हुने र विद्यार्थीलाई कम्तीमा दुई हप्ताको समय दिइने उनले उल्लेख गरे ।
शिक्षा मन्त्रालयका प्रवक्ता दीपक शर्माले विद्यार्थीको स्वास्थ्य महत्पूर्ण विषय भएकाले आफूहरू पर्ख र हेरको स्थितिमा रहेको बताए । परीक्षा नियन्त्रक रामराज खकुरेलले एसईईका परीक्षार्थीलाई घरपायक परीक्षामा सहभागी हुन पाउने सहज व्यवस्था गर्न उपकेन्द्रको सोच अगाडि ल्याइएको र के कति उपकेन्द्र कायम गर्न सकिन्छ भनेर देशभरिका शिक्षा विकास तथा समन्वय एकाइलाई यही महिनाभित्र प्रस्ताव पेस गर्न समय दिइएको जानकारी गराए ।