हेटौंडा प्रयोगशालाको अनिर्णयले आईसोलेसनका ३७ जना बन्दी

६ जेठ, हेटौंडा । हेटौंडा-४ कर्रास्थित आईसोलेसनमा भर्ना भएका ३७ जना रिपोर्टको प्रतिक्षामा रहेका छन् । आइतबार र सोमबार मकवानपुरबाट ४१ नमूना संकलन गरिएकोमा आईसोलेसनमा ३७ जना रहेका छन् । रिपोर्ट नआउँदा उनीहरु आफुलाई कोरोना भएको हो वा होइन भन्ने अन्यौलमा छन् । तर आईसोलेसन वार्डले भने अझै रिपोर्ट नआएको बताईरहेको छ ।
अहिलेसम्म अधिकांश रिपोर्ट सोही दिन आउने गरेपनि सोमबार र मंगलबार भएको परीक्षणको रिपोर्टमा भने ठूलो समस्या उत्पन्न भएको छ । आइतबार हेटौंडा–१० स्थित प्रयोगशालामा विद्युत समस्या भएको भन्दै रिपोर्ट दिईएन । सोमबार विद्युतको आपूर्ति सहज थियो । सोमबार प्रयोगशालाका प्राविधिकबाट पहिलो रिपोर्ट नेगेटिभ आएको भन्ने खबर आएपछि आईसोलेसनमा रहेकालाई लिखित रिपोर्ट आएपछि डिस्चार्ज गर्ने तयारी गरियो । तर पुनः परीक्षण गर्नुपर्ने भन्दै फेरि उनीहरुलाई आईसोलेसनमै राख्न भनियो । 
सोमबार अपरान्हसम्म रिर्पोट आउने प्रतिक्षामा रहेका उनीहरु तब निरास भए जब सोमबार पनि नतिजा नआउने खबर प्राप्त भयो । २ दिनसम्म रिपोर्ट सार्वजनिक नहुँदा आईसोलेसनमा रहेका ३७ र बाहिर रहेकाहरुमा कोरोनासंग जोडेर शंका आशंका उत्पन्न भयो । स्वास्थ्यकर्मी स्रोतका अनुसार केही नमूनाको रिपोर्टमा शंका रहेकाले लिखित रिपोर्टमा हस्ताक्षर गर्न प्रयोगशालाका कर्मचारीहरुले मानेका छैन । आफुहरु ढुक्क भएपछि मात्रै रिपोर्टमा हस्ताक्षर गर्ने उनीरुको अडान छ । 
तर सोमबार राति करिब १० बजेतिर प्रदेश सामाजिक विकास मन्त्रालयका कोभिड–१९ का प्रवक्ता डा. पुरुषोतम सेढाईले २०७७।०२।०५ गते दिउँसो २ बजेसम्म ५६ नमूना प्राप्त भएकोमा हेटौंडा प्रयोगशालामा प्राप्त हेटौंडाका ४१, रौतहट ११, सिन्धुलीको ४ गरी ५६ वटै नमूना नेगेटिभ आएको तथ्यांक सार्वजनिक गरेका छन् । तर आईसोलेसन वार्ड इन्चार्ज भोलाप्रसाद चौलागाई भने आफुलाई अहिलेसम्म रिपोर्ट प्राप्त नभएको बताउँछन् । ‘रिपोर्ट आएको भए त हामीले उहाँहरुलाई विदा गरिसकेका हुन्थ्यौं ।’–उनले भने–‘रिपोर्ट के हो भन्ने जानकारी नपाई कसरी पठाउने ?’ उनका अनुसार स्थानीय तह र आईसोलेसनमा रहेकाले लिखित रिपोर्टको माग गरिरहेका छन् । 
रिपोर्ट अनुसार उनीहरुले कुन ढुंगको व्यवहार गर्ने भन्ने थाहा हुन्छ भने स्थानीय तहले पनि उनीहरुलाई कसरी व्यवस्थापन गर्ने भन्ने स्पष्ट जानकारी हुने स्वास्थ्यकर्मीहरुको भनाई छ । तर प्रयोगशालाको गैरजिम्मेवारीका कारण आईसोलेसनमा रहेका, उनीहरुका आफन्त र सर्वसाधारणमा समेत आशंका र मानसिक तनावको अवस्था छ । यथार्थ रिपोर्ट समयमै सार्वजनिक गर्न वा नभए काठमाण्डौं स्थित राष्ट्रिय जनस्वास्थ्य प्रयोगशाला पठाउनेतर्फ नलागेर हेटौंडास्थित प्रयोगशाला र प्रदेश सामाजिक विकास मन्त्रालयले गैरजिम्मेवारीपन देखाएको गुनासो आएको छ । आईसोलसनमा रहेकाहरुले प्रयोगशालाको अनिर्णयले आफुहरुलाई बन्दी बनाएको गुनासो गरेका छन् ।