मतदाता ढुक्क भए हुन्छ : गृहमन्त्री निधि

३० बैशाख, काठमाडौं । गृहमन्त्री विमलेन्द्र निधिले स्थानीय तहको निर्वाचनमा ढुक्क भएर मतदान गर्न मतदातालाई आग्रह गरेका छन् । निर्वाचन सुरक्षा बारे गृहमन्त्रालयले आयोजना गरेको पत्रकार सम्मेलनमा गृहमन्त्री निधिले निर्वाचनका लागि सबै सुरक्षा तयारी पुरा गरेको भन्दै ढुक्क भएर मतदान गर्न मतदातालाई आग्रह गरे ।

उनले मतदाता, उम्मेदवार र निर्वाचनमा खटिएका कर्मचारीहरुको सुरक्षामा सुरक्षाकर्मी परिचालित भएको बताए । निर्वाचन सुरक्षाका निम्ती २२ हजार ५ सय ७५ प्रहरी, १७ हजार ३ सय ५६ सशस्त्र प्रहरी, २२ हजार ६ सय २ म्यादी प्रहरी र ३ सय ८३ राष्ट्रिय अनुसन्धान विभागका कर्मचारी खटिएको उनले बताए । ५ हजार प्रहरीलाई जगेडा जनशक्तीको रुपमा तयारी अवस्थामा राखिएको पनि गृहमन्त्री निधिले बताए । 

गृह मन्त्रालयका अनुसार प्रदेश नम्बर तीनमा १ हजार ७ सय ८० मतदान स्थल र ३ हजार ४ सय ९० मतदान केन्द्र छन् । यो प्रदेशमा १० हजार ३ सय ७६ प्रहरी, ८ हजार ९ सय ३५ शसस्त्र प्रहरी, १ सय ७५ राष्ट्रिय अनुसन्धान विभागका कर्मचारी र १० हजार ५ सय ९० म्यादी प्रहरी निर्वाचन सुरक्षामा खटिएका छन् । 

प्रदेश नम्बर ४ मा १ हजार २ सय ४७ मतदानस्थल र १ हजार ९ सय ५२ मतदान केन्द्र छ । यो प्रदेशमा ७ हजार ५४ प्रहरी,३ हजार ९ सय ७३ सशस्त्र प्रहरी, १ सय १५ राष्ट्रिय अनुसन्धान विभागका कर्मचारी र ७ हजार ३५ म्यादी प्रहरी निर्वाचन सुरक्षामा खटिएका छन् ।

प्रदेश नम्बर ६ मा ८ सय ९५ मतदानस्थल, १ हजार १ सय ९९ मतदान केन्द्र छन् । यो प्रदेशमा ५ हजार १ सय ४५ प्रहरी, ४ हजार ४ सय ४८ सशस्त्र प्रहरी, ९३ जना म्यादी प्रहरी र ४ हजार ९ सय ७७ म्यादी प्रहरी निर्वाचन सुरक्षामा खटिएका छन् ।