तराईबाट आएका मजदुर हेटौंडा-६ का स्थानीयले लखेटे

तराईबाट मजदुर ल्याएकोमा विरोधमा उत्रिएका स्थानीय

९ जेठ, हेटौंडा । कोरोना संक्रमण भएका तराईका जिल्लाबाट आएका मजदुरहरुलाई हेटौंडा–६ कृष्णनगर र चुच्चेखोलाका स्थानीयले शुक्रबार फिर्ता पठाई दिएका छन् । 

कृष्णनगरमा रहेको तारजाली उत्पादक उद्योग मार्मा वायर्समा कामका लािग एकाविहानै गाडिमा ल्याईएका २५ मजदुरलाई स्थानीयले फिर्ता पठाएका हुन् । कोरोना संक्रमित बढिरहेका बारा र पर्साबाट अचानक ल्याईएका मजदुरहरुका कारण जोखिम बढ्ने भन्दै उनीहरुले विरोध गरेका थिए । हेटौंडा–६ का वडा अध्यक्ष अर्जुनप्रसाद चौलागाईले वडाबासीको स्वास्थ्य भन्दा ठूलो उद्योग व्यवसाय हुन नसक्ने भएकाले प्रशासनको समन्वयमा फिर्ता पठाएको बताए । 

‘न कुनै जाँच गरेको छ, न वडामा समन्वय गरेको विहान हुनु अघि लुकाएर मजदुर ल्याएको पाईयो’ उनले भने–‘स्थानीयले खबर गरेपछि उनीहरुलाई बसमा राखेर पुनः उनीहरुकै जिल्ला पठाईएको छ ।’ उद्योगीले हेटौंडा उपमहानगरपालिकाका मेयर हरिबहादुर महतसंगको समन्वयमा मजदुर ल्याएको बताए । उद्योगीले उनीहरुलाई उद्योगभित्र राखेर काम लगाउने भनेपनि स्थानीय त्यहाँ स्थानीय कामदार समेत रहेकाले संगै काम गर्दा कोरोना संक्रमणका कारण गाउँ नै समस्या पर्ने भएकाले जोखिम लिन नसकिने बताएपछि उद्योगीले मजदुर फिर्ता पठाएका छन् ।

चुरियामाईमा प्रदेश २ मा आउन कडाई गरेको प्रशासनले जनाईरहँदा २५ जना हेटौंडा आईपुग्दा पनि नरोक्नु आश्चर्यको विषय भएको स्थानीयको भनाई छ ।