मकवानपुरका ३ चेपाङ युवाद्वारा मजदुर परिवारलाई राहत 

मोटरसाइकलमा मजदुर परिवार बसकै ठाउँमा राहत पुर्याउँदै ।

१६ जेठ, हेटौंडा । लकडाउनको समयमा समस्यामा परेका मजदुर परिवारलाई मकवानपुरका ३ चेपाङ युवाले राहत उपलग्ध गराएका छन् । विभिन्न सहयोगी महानुभावको समन्वयमा उनीहरुले काठमाडौं उपत्यकाभित्र राहत वितरण गरेका हुन् । 
उनीहरुले चेपाङ समुदायका मजदुर मात्रै नभई अन्य समुदायका मजदुरलाई पनि सहयोग गरेको अभियानमा जुटेका नेपाल चेपाङ संघका केन्द्रीय कोषाध्यक्ष रविन्द चेपाङले बताए । अभियन्ता मनिष चेपाङ, अमृत चेपाङ र रबिन्द्रको सकृयतामा लकडाउनको अहिलेसम्मको अवधीमा कतै घरमै पुगेर त कतै मजदुर जम्मा बनाएर राहत वितरण गरेका छन् । उनीहरुको अभियानका लागि खेमबहादुर चेपाङ १८ हजार रुपैंया, कुमारसिंह प्रजाबाट १० हजार रुपैंया, नविन दार्सिराङ प्रजा ७ हजार ९ सय १७ रुपैंया, रेसम प्रजाबाट ६ हजार रुपैंया, महेश गालसाराङ चेपाङबाट ५ हजार २ सय १० रुपैंया, मदन प्रजाबाट ४ हजार रुपैंया, अनन्त गालसाराङ प्रजाबाट ३ हजार रुपैंया, रेसका प्रजाबाट ३ हजार रुपैंया, करण प्रजाबाट ३ हजार रुपैंया, मंगलसिंह प्रजाबाट ३ हजार रुपैंया, फसल प्रजाबाट २ हजार १० रुपैंया, बीरबहादुर प्रजा २ हजार १० रुपैंया गरी ६७ हजार १ सय ४७ रुपैंया अभियान्ता मनिषलाई हस्तान्तरण गरेको थियो । अभियन्ताहरू पनि रकम थपेर १ लाख ९ हजार १ सय ४७ रुपैंया बाट ७० घरधुरीलाई सहयोग गरिएको छ । 
पिडित चेपाङहरूलाई चेपाङ अभियन्ताहरूमार्फत चेपाङहरूले नै सहयोग गर्नु सुखद कुरा भएको नेपाल चेपाङ संघ मकवानपुरका पूर्वअध्यक्ष तथा नेपाल आदिवासी जनजाति महासंघ जिल्ला समन्वय समिति मकवानपुरका उपाध्यक्ष खेमबहादुर चेपाङको भनाई छ । समाजसेवी कुमारसिङ प्रजाले विगतमा अरूले दिएको थापेर खाने चेपाङ समुदाय आफैं सहयोग गर्न अग्रसर हुनु सकारात्मक सन्देश भएको बताए । चेपाङ अभियन्ताहरु रविन्द्र, मनिष र अमृतको अभियानबाट अरुले पनि सिक्नु जरुरी रहेको राहत प्राप्त गरेकाहरुको भनाई छ ।