विपन्नलाई खाद्यान्न र स्वास्थ्य सामग्री प्रदान

१७ जेठ, हेटौंडा । कोरोना भाइरसका कारण जारी लकडाउनमा दैनिक ज्याला मजदुरी गरी गुजारा चलाउनुपर्ने अति विपन्न परिवारलाई खाद्यान्न र स्वास्थ्य सामग्री प्रदान गरिएको छ ।
चाइल्ड रेस्क्यु नेपालको आर्थिक सहयोगमा इस्थर बेन्जामिन स्मृति संस्थाले पश्चिम मकवानपुरको राक्सिराङ गाउँपालिकासँग सहकार्य गरी न्युन आय भएका राक्सिराङका २ सय परिवारलाई खाद्यान्न हस्तान्तरण गरेको हो ।
संस्थाले २ सय परिवारलाई चामल ६ हजार किलो (२ सय बोरा), दाल ४ सय किलो, तेल ४ सय लिटर, नुन ४ सय किलो, स्वच्छता (हाईजिन) किट २ सय पाकेट प्रदान गरेको इस्थर बेन्जामिन स्मृति संस्थाका मकवानपुर कार्यक्रम ब्यवस्थापक बुद्ध लामाले बताए । उनका अनुसार प्रति परिवार चामल ३० किलो (१ बोरा), दाल २ किलो, तेल २ लिटर, नुन २ किलो, स्वच्छता किट १ पाकेट प्रदान गरिएको थियो ।
त्यस्तै, राक्सीराङको स्वास्थ्य संस्थालाई सेनिटाइजर २० लिटर, हात धुने लिकुइड १० लिटर, सर्जिकल ग्लोब्स १ हजार ५ सय वटा, सर्जिकल मास्क १ हजार ६ सय वटा प्रदान गरिएको छ । सामग्री हस्तान्तरण कार्यक्रममा राक्सिराङ गाउँपालिकाका अध्यक्ष राजकुमार मल्ल, उपाध्यक्ष निर्मला हिम्डुङ लगायतको सहभागिता रहेको थियो ।