साथीको हत्या गर्ने चारजना पक्राउ

१८ जेठ, दाङ ।  शुक्रबार भएको हत्याको घटनमा संलग्‍न भएको आरोपमा प्रहरीले चारजनालाई पक्राउ गरेको छ । तुलसीपुर ९ अटोभिलेज स्थित रेडियटर मर्मत पसल सञ्चालक रहेका २८ वर्षीय मन्दिप भुजको हत्यारालाई प्रहरीले आइतबार तुलसीपुरमा पत्रकार सम्मेलन गरी सार्वजनिक गरेको हो । 

भुजको उनकै साथीहरु मिलेर हत्या गरेको इलाका प्रहरी कार्यालय तुलसीपुरले जानकारी दिएको छ । डिएसपी हरिहरनाथ योगीले पत्रकार सम्मेलन मार्फत जानकारी दिँदै गत जेठ १६ गते शुक्रबार राति अटोभिलेज नजिकै रहेको चौधरी होटेलमा साथीहरुसँगै मादक पदार्थ सेवन गरी सामान्य विवाद हुँदा उनको हत्या भएको बताएका छन् ।घटना भएको पाँच घण्टामै हत्याराहरु पक्राउ गर्न सफल भएको तुलसीपुर प्रहरी प्रमुख हरिहरनाथ योगीले भने । शनिबार बिहान मृत फेला परेका भुजको सुक्ष्म अनुसन्धान गर्दा घटना भएको ६ घण्टाभित्र केहीलाई नियन्त्रणमा लिँदा हत्यारा पत्ता लगाउन सफल भएको उनले बताएका छन् ।

उनका अनुसार तुलसीपुर ५ बस्‍ने अजय बुढाथोकी, सोहि वडाका आशीष नेपाली, तुलसीपुर १८ बस्‍ने ओमबहादुर सार्की र अर्घाखाँची जिल्ला ढिकुरा घर भई हाल तुलसीपुर ६ बस्‍ने शौरभ पोख्रेल मिलेर भुजको हत्या गरेको प्ररम्भिक अनुसन्धानमा देखिएको प्रहरीले जनाएको छ ।  ती चार जना अभियुक्त मध्ये सुरुमा शौरभ पोख्रेलले ढुङ्गा प्रहार गरी गम्भीर घाइते बनाएपछि अन्य तीन जना घटना संलग्‍न भएको अनुसन्धानबाट खुलेको डीएसपी योगीले बताएका छन् ।होटेलमासँगै बसेर मापसे गरी होटेलमा होहल्ला गर्दा होटेलकी साहुनीले अबेर भयो घर जानुस् भनेपछि उनीहरु त्यहाँबाट निस्किएको र बाटोमा विवाद हुँदा तुलसीपुर ५ मा रहेको ज्ञानज्योति आधारभूत विद्यालयको नवनिर्मित भवन पछाडि लगेर हत्या गरेको प्रहरीको भनाइ छ ।

उनीहरुले मापसे गरी लागूऔषध समेत सेवन गरेको पाइएको छ । लागूऔषधकै विषयमा एक अर्काबीच भनाभान हुँदा विवाद भएको प्रहरी प्रमुख गणेश चन्दले पत्रकार सम्मेलन गरेर यस्तो जानकारी दिएका छन् ।होटेलमा मापसे गर्दा उनीहरुसँगै गएका सुमन बस्‍नेत र सुनिल विक भने घटना नहुँदै घर गएका थिए । यस्तै उनीहरुसँग मापसे गरेका अर्का टिकम बु्ढामगर पनि उनीहरुको विवाद हुँदा त्यही भएको र झगडा नगर भनी उनी घर गएको अनुसन्धानबाट खुलेको प्रहरीको भनाइ छ । उनीहरु घर गइसकेपछि मृतक भुजसहित पाँच जनाको विचमा विवाद हुँदा उक्त घटना भएको हो ।

साभारः बाह्रखरी