प्रधानमन्त्रीसहितको गीति एल्बम विमोचन

२५ जेठ, काठमाडौं । प्रधानमन्त्री केपी शर्मा ओलीसहितको रचना रहेको गीति एल्बम विमोचन भएको छ ।
गीति एल्बम ‘समृद्ध नेपाल, सुखी नेपाली’को विमोचन गरिएको सरकारी समाचार संस्था राससलाई उद्धत गर्दै विभिन्न संचारमाध्यमहरूले लेखेका हुन् । मध्यपुरथिमि नगरपालिका–४ कमेरोटारको खुला ठाउँमा सडक मानव सानुकान्छा तामाङ र मुगा कार्कीले एल्बमको विमोचन गरेका थिए ।
राष्ट्रिय युवा सङ्घ नेपालका सहसंयोजक रमेशकुमार पौडेलेको संयोजनमा तयार भएको एल्बममा प्रधानमन्त्री ओलीसहित पाँच रचनाकारको गीत समावेश गरिएको छ । एल्बममा प्रधानमन्त्री ओलीले रचना गरेकाे गीत ‘स्वदेशमै रोजगारी स्वदेशमै बास रोजिँदैन प्रवासलाई’ गायक शान्तिराम राई र मेलिना राईले आवाज दिएका छन् । त्यस्तै पौडेलले रचना गरेकाे ‘हेर हाम्रो हिमाल हाँसेको हेर्न खोज्यौ सुखी खुशी जनता नाँचेको’ गीतमा बद्री पङ्गेनी र मेलिना राईले आवाज दिएका छन्। 
रचनाकार विपिन किरणको ‘समृद्ध नेपाल, सुखी नेपाली’ बोलको गीत र पौडेलको रचना रहेको अर्को गीत ‘मुर्झिएका सपनाहरु ब्युँझायौँ तिमीले’मा भने राजेश पायल राईले आवाज दिएका छन् ।     
त्यस्तै विपिन किरणको रचना रहेको अर्को गीत ‘पूर्वपश्चिम सीमातिर दुस्मनले नजर लगायो’ मा बद्री पङ्गेनी र मेलीना राईले आवाज दिएका छन् ।