भोरको नेतृत्वमा बागमती प्रदेशका ६ सय चेपाङलाई पोषण प्याकेज

File Photo

२७ जेठ, हेटौंडा । बागमती प्रदेशका ६ सय चेपाङलाई विभिन्न सामाजिक संस्थाले पोषण प्याकेज उपलब्ध गराउने भएका छन् । पोषण सामाग्री पाउनबाट वञ्चित चेपाङ समुदाय लकडाउनमा कष्टकर जीवनयापन गर्दै आएकाले उनीहरूले पोषण प्याकेज उपलब्ध गराउन लागेका हुन् ।
भोर र मिथिला वाइल्डलाइफ ट्रस्टको सहकार्य तथा छोरा छोरी, गानडिज र लास्ट नाइट अ डिजे सेभड माई लाइफ संस्थाहरुको आर्थिक सहयोगमा पोषण उपलब्ध गराउन लागेको भोरको अध्यक्ष पचुलाल माझी मुसहरले बताए । कार्यक्रमको बागमती प्रदेश नीति तथा योजना आयोगका उपाध्यक्ष श्याम कुमार बस्नेतद्वारा अनलाइन शुभारम्भ गरेका छन् ।
कार्यक्रममा बागमती प्रदेश, सामाजिक विकास मन्त्रालय, स्वास्थ्य निर्देशनालयका निर्देशक रमेश अधिकारी,मिथिला वाइल्डलाइफ ट्रस्टका प्रमुख देवनारायण मण्डल लगायतले संकटग्रस्त वर्गलाई पोषणको महत्व, सदुपयोग लगायतबारे धारणा राखेका थिए ।
चेपाङ समुदायलाई प्रतिपरिवार २० किलो चामल, १ किलो दाल, ०.५ लिटर खानेतेल, ०.५ किलो सोयाबिन, ५ किलो हरियो तरकारी, स्थानीय स्तरमा उपलब्ध फलफुल, १ किलो गेडागुडी, १ किलो आयोडिन युक्त नुन र १५ पिस अण्डा सहयोग गर्ने मिथिला वाइल्ड लाइफ ट्रष्टका प्रमुख देव नारायण मण्डलले बताए ।