बोर्डिङ मास्टरको बकपत्र

एसके निधन

मालिक!
अस्थाई कोरोना कहरमा
देखिएको तपाईंको स्थायी नियतले
झसङ्ग झस्काएको छ
चुसुक्क चस्किएको छ मन।
-
बर्षौ देखिको
मेरै पसिना प्रेममा हुर्किएका हुन फैलावट-जरा
कट्ठा रोपनी बिघा
माटोले क्षेत्रफल तन्काईरयो
लिजको टारिखेत
निजि बेसिफाटमा रुपान्तरण भयो
र पनि
कहिल्यै घुटुक्क निलिन ईश्र्याको थुक
हेक्का नै राख्न आउदैन थ्यो:
धन्सारमा कति भित्रिन्थ्यो धान
चुपचाप चुपचाप
जोतिरहन्थे खेत र थापिरहन्थे सुक्का ज्याला ।
-
यसपटक
धान भित्र्याएर गहुँ छर्ने बेला थियो
आफैं अर्जापेको फाली मिलाउदै थिए हलोमा
अचानक !
खेती र खेतमा होईन मनमा कोरोना कहर पस्यो
काम रोक्नु ! माथिबाट आदेश आयो
मैले जोत रोके
तपाईंले च्याठ्ठिदै
रित्तो धन्सारको फोटो देखाएर ज्याला रोकिदिनु भो।
-
मालिक !
मेरो ज्याला तपाईंलाई ज्याला मात्रै लाग्ला
मेरो सबथोक त्यही हो:
आमाको औषधि
प्रीयाको फरिया
बाबुनानिको खाना
मेरो खुशी
सबै सबै रोकिएपछि म नरोकिनुको के अर्थ रयो र?
-
भोलिपल्ट एउटा समाचार आउला:
स्वर्गलोकमा अवस्थित
जनता बोर्डिङका एक शिक्षकले गरे आत्महत्या
परिवारको बिचल्ली
समाजसेवी प्रीन्सिपलले उपलब्ध गराए राहत-
२५ किलो चामल
एक बोरा आलु
दुईपोका भटमासको तेल
तीन किलो दाल
रु एघार हजार एघार सय एघार क्रीया खर्च ।

एउटा समाचार