डकर्मी तालिमको अनुगमन

१३ जेठ, हेटौंडा । मकवानपुरको पूर्वी क्षेत्रमा सञ्चालित ५० दिने ढुङ्गे डकर्मी तालिमको अनुगमन गरिएको छ । हेल्भेटास/सोडेक प्रालि सर्लाही र आवास, पुर्ननिर्माण तथा पुर्नलाभ मञ्च, मकवानपुरले संयुक्त रुपमा  अनुगमन गरेको हो ।

अनुगमन टोलीले बकैया गाउँपालिका ६ श्रीपुर र बकैया–८ स्कुलदमारमा निर्माण भईरहेको घरको अनुगमन तथा छलफल गरिएको थियो भने बकैया–४ अजिंगरे र माझीखोलामा निर्माण भएको घरको अनुगमन गरिएको थियो । ५० दिने तालिमकै क्रममा एउटा १० जनाको समूहले २ वटा घर निर्माण गर्ने गर्दछन् ।

कार्यक्रममा पुर्ननिर्माण प्राधिकरण जिल्ला समन्वय समितिको सचिवालय, मकवानपुरका प्रमुख पुष्पराज अधिकारी, भुकम्पीय आवास तथा पुर्ननिर्माण जिल्ला आयोजना कार्यान्वयन इकाई मकवानपुरका अनुगमन तथा मुल्याकंन बिशेषज्ञ बिबेक गौतम, आवास, पुर्ननिर्माण तथा पुर्नलाभ मञ्च, मकवानपुरका संयोजक रामहरी अधिकारीको सहभागी थिए ।

त्यस्तै, जिल्ला समन्वय समिति मकवानपुरका सामाजिक बिकास अधिकृत रामकृष्ण थापा, मकवानपुरका सहायक जिल्ला शिक्षा अधिकारी हुमनाथ शर्मा, सोडेक प्रालिका प्रबन्ध निर्देशक ललन चौधरी, रिसु श्रीवास्तव लगायतको सहभागिता रहेको थियो ।

पुर्ननिर्माण सीप कार्यक्रम अन्तरगत मकवानपुरको साविकको २४ गाबिसका १ हजार ४ सय जनालाई ५० दिने डकर्मी तालिम दिने लक्ष्य हेल्भेटास स्वीस ईन्टरकोअपरेशन नेपालको छ । जसमध्ये ३० प्रतिशत अर्थात् ४ सय २० महिला अनिबार्य सहभागी गराउने सर्त राखिएको छ ।

हालसम्म सम्पन्न भएको डकर्मी तालिममा ३ सय ६० जनामध्ये १ सय १९ जना महिला सहभागी भईसकेको हेल्भटासका क्लष्टर संयोजक सुकबहादुर चौधरीले जानकारी दिए । ६ सय २० जना सहभागी सञ्चालन भईरहेको तालिममा १ सय ८० जना महिला छन् ।