हेटौँडा–६ शान्तिटोलका युवा व्यवसायीक कृषिमा

सुनिल शिवाकोटी

९ असार, हेटौंडा । रोजगारीको लागि युवाशक्ती विदेशिएको समयमा हेटौँडा-६ का ५ जना युवाहरु यतिबेला स्वदेशमै कृषि कर्मबाटै स्वरोजगार हुर्नुपर्छ भन्ने अठोटका साथ तरकारी व्यवसायिक कृषि पेशातर्फ आकर्षित भएका छन् ।

कृषि उत्पादनले पर्याप्त बजार पाउन थालेसँगै हेटौँडा-६ चौघडा, शान्टिोलमा ५ जना युवाहरुले कृषि फर्म नै दर्ता गरी व्यवसायिक कृषि पेशातर्फ आकर्षित भएका हुन् ।  करिब ६ महिना अगाडी ३५ लाख खर्चेर रोयल अर्गानिक एग्रो फर्म एण्ड रिसर्च सेन्टर नामक कम्पनी दर्ता गरी कृषि व्यवसाय शुरू गरेका उनीहरुले आम्दानी समेत गर्न थालिसकेका छन् । 

१५ कठ्ठा क्षेत्रफलमा फैलिएको कृषि फर्ममा लहरे तरकारी वाली, तितेकरेला, लौका, बोडी लगायतका मौसमी र बेमौसमी सिजनका तरकारी बाली, १२ सय लोकल कुखुरा, २ वटा पोखरीमा विभिन्न प्रजातिका ५ हजार माछा रहेको रोयल अर्गानिक एग्रो फर्म एण्ड रिसर्च सेन्टरका अध्यक्ष भरत सापकोटाले जानकारी दिए ।

विषादी प्रयोग भएका उत्पादन भन्दा विषादीरहित उत्पादन उपभोक्ताले रुचाउने भएकाले मौसमी तथा बेमौसमी तरकारी खेतीसँगै केहि नयाँ प्रजातिका माछा, टर्की, लोकल र बोइलर कुखुरा र बाख्रा पालन गर्न तयारी रहेको बताए ।  'आगामी बर्ष देखि वायो फ्लक प्रविधि मार्फत माछा पालन र तालिम सञ्चालन गर्ने  योजनामा छौँ ।'-सापकोटाले भने ।युवाशक्ति बिदेशिने क्रम बढिरहेको बेला, मलेसियाबाट फर्किएका उत्तम ढकाल फर्ममै आफ्नो भविष्य सुनिश्चित हुने विश्वास व्यक्त गरिरहेका छन् ।  'मेहनत गरे आफ्नै ठाउँमा मनग्य कमाइ गर्न सकिन्छ भन्ने मेरो विश्वास छ ।'-उनले भने । 

यहाँ उत्पादीत गरेका तरकारी, कुखुरा,माछा जिल्लाका विभिन्न ठाँउमा पुग्ने गरेकोले तरकारी खेतीलाई व्यवसायिक बनाउन पानी, रोग किरा कम लाग्ने, मल्चीङ्ग प्रबिधिबाट तरकारी खेती गर्ने तयारीमा रहेको ढकालले भने  । हेटौँडा वडा नम्बर –६ का वडाध्यक्ष अर्जुनप्रसाद चौलागाई शिक्षित ५ जना युवाहरुको समुहले मिलेर शुरु गरेको कृषि व्यवसायीले कृषि पेशाबाट पनि आत्मनिर्भर बन्न सकिन्छ भन्ने सन्देश दिन सफल भएको बताए । 

वडाध्यक्ष चौलागाईले युवा पुस्ता कृषि पेशामा लाग्नु उदाहरणीय कार्य भएको भन्दै उनले संलग्न युवालाई सहयोग गर्ने बताए ।