'ओलीले एक पद छाड्नैपर्छ' : खुमलटार बैठक

File Photo

५ साउन, काठमाडौं । सत्तारुढ दल नेपाल कम्युनिस्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ले सोमबार बिहान आफू पक्षीय स्थायी समिति सदस्यहरुसँग छलफल गरेका छन् । प्रचण्डले आइतबार सचिवालयका चार सदस्यसहित माधवकुमार नेपाल पक्षका केही स्थायी समिति सदस्यहरुसँग पनि यसै विषयमा छलफल गरेका थिए । 
लगत्तै सोमबार बिहान उनले पूर्वमाओवादी केन्द्रतर्फका स्थायी समिति सदस्यहरुसँग झण्डै तीन घण्टा छलफल गरेका हुन् । छलफलमा सहभागी एक नेताका अनुसार पार्टीभित्र देखिएको विवादको समाधान गर्न प्रधानमन्त्री समेत रहेका केपी शर्मा ओली नै अग्रसर हुनुपर्ने निष्कर्ष निकालेको छ । ‘पार्टी अध्यक्ष र प्रधानमन्त्री समेत भएको नाताले उहाँले नै निकास दिनुपर्छ र पार्टी एकतालाई पनि बचाउनुपर्छ । त्यसका लागि ओलीले अध्यक्ष वा प्रधानमन्त्रीमध्ये एक पद छोड्नुपर्छ भन्ने कुरामा नेताहरु एकमत देखिनुको भएको छ’, ती नेताले रातोपाटीसँग भने, ‘उहाँ ओलीजी प्रतिपक्षजस्तो बन्नुभएन, घुर्की लगाउनुभएन । बैठक नराख्ने र राखेपनि बीचमै छोड्ने त कहिले महाधिवेशनको कुरा ल्याएर समस्या समाधान नभई पन्छाउने प्रयासमा लाग्नुभएको छ । यो प्रवृत्तिले निकास आउँदैन । त्यसैले उहाँले नै निकास दिन जरुरी छ । त्यसमा रोज्ने जिम्मा उहाँलाई छ, बल उहाँकै कोर्टमा छ ।’
नेकपाको स्थायी समिति बैठक मंगलबार बस्दैछ । बैठकअघि रणनीति बनाउन प्रचण्डपक्षका नेताहरुबीच छलफल भएको हो । ‘पार्टी फुट्नु हुँदैन । पार्टी र सरकार दुवै चल्नुपर्छ । त्यसका लागि विधानको पालनमा जोड दिनुपर्छ भन्ने विषयमा विभिन्न कोणबाट छलफल भयो’, स्थायी समिति सदस्य लिलामणि पोखरेलको भनाइ छ । 
त्यस्तै पार्टी एकता बलियो बनाउने, एकता प्रक्रियालाई टुंग्याउने र महाधिवेशनबारे बाहिर भएका चर्चा लगायतका विषयमा छलफल भएको स्थायी समिति सदस्य देवेन्द्र पौडेलले जानकारी दिए । ‘यस्ता छलफल नेताहरुबीच सधैँ हुने गरेका हुन् । अहिलेको अवस्थामा पार्टी एकताको मजवुती र चर्चामा आएको महाधिवेशन लगायतका विषयमा छलफल र कुराकानी भयो’, पौडेलले रातोपाटीसँग भने, ‘यिनै विषयलाई केन्द्रविन्दुमा राखेर सहज र संयमित ढंगले स्थायी समितिमा प्रस्तुत हुन अध्यक्षले आग्रह गर्नुभयो ।’
छलफलमा सहभागी नेताहरुले पछिल्लो पटक सचिवालय बैठकमा प्रस्तावका रुपमा आएको ‘अर्ली महाधिवेहन’ का बारेमा जिज्ञासा राखेका थिए । जवाफमा प्रचण्डले अर्ली महाधिवेशनका बारेमा सहमति नगरेको प्रस्ट्याएका थिए । 
(रातोपाटीबाट)