बंशगोपाल माविलाई सेनेटाइजर र थर्मलगन सहयोग

१३ साउन, हेटौंडा । हेटौंडा उपमहानगरपालिका वडा नम्बर ६ चौघडामा रहेको वंशगोपाल माध्यामिक विद्यालयलाई सेनिटाईजर र थर्मलगन सहयोग प्राप्त भएको छ । 
हेटौंडा ६ का वडा अध्यक्ष अर्जुनप्रसाद चौलागाई र चौघडामा रहेको आयु पोली क्लिनीकका सञ्चालक उत्सव चौलागाईले विद्यालयलाई सेनिटाईजर र थर्मल गन सहयोग गरेका हुन् ।
वडा अध्यक्ष चौलागाईले ज्वरो नाप्ने थर्मल गन र आयु पोली क्लिनिकका सञ्चालक चौलागाईले ५ लिटर सेनिटाईजर विद्यालयका प्रधानाध्यापक रमेशप्रसाद लामिछानेलाई संयुक्त रुपमा हस्तान्तरण गरेका छन् । विद्यालयहरु सञ्चालनमा आउने क्रममा रहेकाले विद्यार्थीहरुको स्वास्थ्य सुरक्षालाई मध्यनजर गर्दै सेनिटाईजर र थर्मल गन सहयोग गरिएको वडा अध्यक्ष चौलागाईले बताए । 
लकडाउन खुलेपनि कोरोना संक्रमणको प्रकोप दिन प्रतिदिन बढ्दै गएको अवस्थामा विद्यालय सञ्चालनमा आउँदा सावधानी अपनाउनका लागि सुरक्षा सामाग्री प्रदान गरिएको उत्सव चौलागाईले बताए । विद्यालयलाई आएको सहयोग लिँदै प्रधानाध्यापक लामिछानेले विद्यालय परिसरमा आउने विद्यार्थीहरुको नियमित रुपमा ज्वरोको परीक्षण गर्न सहयोग पुग्ने बताए ।
‘सरकारले नै विद्यालय सञ्चालन गर्ने भनेपछि हामीपनि त्यसैको तयारीमा छौँ’, लामिछानेले भने,‘पटक पटक गरेर अभिभावकहरुसंग समन्वय बैठक पनि हामीले गरेका छौँ । अभिभावकहरु विद्यालयमा बालबालिकाहरु पठाउन तयार हुनुहुन्छ ।’ विद्यार्थीहरु विद्यालय परिसरमा आउँदा पूर्ण रुपमा सावधानी अपनाएर मात्र कक्षा सञ्चालनको तयारी भईरहेको उनले बताए ।