दृष्टिविहिनलाई कृषि तथा पशुपालन तालिम

३० जेठ, हेटौँडा । मकवानपुरको थाहा नगरमा दृष्टिविहीनहरुका लागि संचालित ३ दिने आधुनिक कृषि तथा पशुपालन सम्बन्धि तालिम सम्पन्न भएको छ । नेपाल नेत्रहिन संघ पुनस्र्थापन कार्यक्रम मकवानपुर र मकवानपुर नेत्रहीन संघको सहकार्यमा तालिम भएको हो ।
थाहा नगरपालिकाका नव निर्वाचित मेयर लबशेर बिष्टको प्रमुख आतिथ्यतामा भएको थियो । तालिममा सहभागि १८ जना प्रशिक्षार्थीहरुलाई तालिमको प्रमाण पत्र वितरण गर्दै विष्टले आगामी दिनमा दृष्टिविहिन र अपांगता भएकाहरुको सहयोगका लागि आफु प्रतिवद्ध रहेको बताए । 
कार्यक्रममा थाहा नगर पालिकाका उपमेयर खड्ग बहादुर गोपाली, नेकपा एमालेका रामकृष्ण बस्नेत, पुर्नस्थापना कार्यक्रमका क्षेत्र अधिकृत प्रेम महर्जन, ईलाका प्रहरी कार्यालय पालुङका प्रहरी नायब निरिक्षक बेलबहादुर राउत, भूतपूर्व सैनिक संघका जिल्ला अध्यक्ष कमल कुमार केसी, कृषि प्राविधिक सहायक कृषि सेवा केन्द्र दामनका प्रमुख राघवेन्द्र मिश्र, प्रशिक्षार्थी दुर्गा कार्की लगायतले मन्तव्य व्यक्त गरेका थिए । 
तालिम समापन कार्यक्रम नेत्रहीन संघको अध्यक्ष प्रवीण ग्वाछाको अध्यक्षतामा भएको थियो । तालिमको सहजीकरण फिल्ड सुपरभाईजर जीवन डल्लाकोटीले गरेका थिए ।