हेटौंडामा खोई सुरक्षा मापदण्ड? कडा गर्ने प्रशासनको आश्वासन

सुरक्षा मापदण्ड उल्लेख गर्दै मास्क नलगाएकालाई सम्झाउँदै मकवानपुरका डिएसपी इन्द्र बहादुर राना

२३ साउन, हेटौँडा। कोरोना संक्रमणको दर बढिरहेको अवस्थामा बागमती प्रदेशको सदरमुकाममा भने कुनै स्वास्थ्य सुरक्षाको न्यूनतम मापदण्ड पालना नगरिएको सर्वसाधारणको गुनासो छ ।

लकडाउन हटेसंगै कोरोना संक्रमण दैनिक सय बढि थपिइरहेका जिल्लाबाट धेरै सर्वसाधारण जिल्ला प्रवेश गरिसकेको अवस्थामा पनि कुनै मापदण्ड पालना नभएको हो । हेटौंडा बजारमा अधिकांश सर्वसाधारण मास्क विना नै हिडडुल गर्ने गरेका छन् । व्यवसायिक क्षेत्रमा पनि भौतिक दुरी, स्यानेटाईजरका कुराहरुमा त्यति ख्याल नगरेको सर्वसाधारणको अनुभव छ ।

सर्वसाधारणले कोरोना जोखिम रोक्न अपनाउनुपर्ने स्वास्थ्य सावधानी अपनाउन र सोही अुनसारको मापदण्ड पालना गर्न व्यवसायिक एवं अन्य क्षेत्रले पनि उदासिनता देखाउन थालेपछि कडाई गर्ने प्रशासनले निर्णय गरेको छ । 

शुक्रबार विहान भएको जिल्ला कोभिड–१९ संकट व्यवस्थापन केन्द्रको बैठकले मापदण्ड पालना नगर्नेलाई कारवाही गर्ने निर्णय भएको जिल्ला प्रशासन कार्यालय मकवानपुरले जनाएको छ । बैठकले हेटौंडा बजार क्षेत्रमा मानिसहरुको भिडभाड बढेको हुँदा बजार क्षेत्रमा स्वास्थ्य तथा सुरक्षाका न्यूनतम मापदण्ड पुरा भए नभएको प्रभावकारी अनुगमन गर्ने र मापदण्ड पालना नगर्नेहरुलाई तत्काल कारवाहीको दायरामा ल्याउने निर्णय गरेको छ ।बजार क्षेत्रमा मापदण्ड पालुना गराउन मकवानपुर उद्योग बाणिज्य संघले नियमित रुपमा सूचनामुलक सन्देशहरुको माईकिङ गराउने निर्णय भएको मकवानपुरका प्रमुख जिल्ला अधिकारी दिपकराज नेपालले जानकारी दिए ।