सुनौला हजार दिनको अनुगमन

२ असार, हेटौँडा । जिल्ला समन्वय समितिमार्फत संचालन भईरहेको सुनौला हजार दिन कार्यक्रमको शुक्रबार अनुगमन गरिएको छ । जिल्लाका सरोकारवाला निकाय र संचारकर्मीको टोलीले धियालमा संचालित गरेको कार्यक्रमको अनुगमन गरिएको हो । 
कार्यक्रममा धियालका लाभग्राहीहरुले समन्वय अभावमा कार्यक्रम प्रभावकारी ढंगबाट संचालन हुन नसकेको गुनासो गरेका थिए । उनीहरुले जिल्लाबाट आउने बजेटलाई प्रभावकारी कार्यान्वयनका लागि स्थानीय तहमा सक्रिय टोली संयोजकहरुले तत्परता नदेखाएको गुनासो गरे । कार्यक्रममा सचेतनाको कमिका कारण कार्यक्रमको प्रभावकारी कार्यान्वयनका लागि उदासिन देखिएको स्थानीय सरोकारवालाहरुले गुनासो गरे । 
कार्यक्रममा धियालको पुरानो केही वडामा रकम निकासा भएपनि कार्यक्रम नभएको र केही वडामा आंशिक रुपमा भएको जानकारी दिईएको थियो । स्थानीय तहको पुर्नसंरचना हुँदा स्थानीय तहको खाता परिवर्तन समयमै हुन नसक्दा पनि रकम प्राप्ति र खर्चमा समस्या भएको कार्यक्रमका धियाल गाविस कोच जनकबहादुर रुम्बाले बताए । कार्यक्रमका लागि ३० प्रतिशत रकम निकासा भई प्रभावकारी काम भएको वडाको पेश्कि फछ्यौंट गरिने र अन्यको कडाईका साथ निगरानी गरिने सुनौला हजार दिन कार्यक्रम सहायक अशोक सारु मगरले बताए । 
अनुगमनमा जिल्ला समन्वय समितिका सामाजिक विकास अधिकृत रामकृष्ण थापा, महिला तथा बालबालिका कार्यालयकी दुर्गा घिमिरे, खानेपानी तथा सरसफाई कार्यालयका सञ्जयकुमार ठाकुर, जिल्ला कृषि विकास कार्यालयका सञ्जय तिवारी, गैरसरकारी महासंघ मकवानपुरका दिपेन्द्रकुमार पाठक लगायतले लाभग्राहीका समस्याबारे जानकारी लिई जिज्ञासाको समाधान गरिएको थियो ।