कोरोना संक्रमणबाट थप ११ जनाको मृत्यु भएको पुष्टि

५ भदौ, हेटौंडा । स्वास्थ्य तथा जनसंख्या मन्त्रालयका अनुसार  नेपालमा कोरोना भाइरस (कोभिड—१९) बाट थप ११ जनाको मृत्यु भएको छ । 
मन्त्रालयका अनुसार शुक्रबार एक जना महिला र १० जना पुरुष गरी ११ जनाको मृत्यु भएको पुष्टि भएको हो । 
मन्त्रालयका प्रवक्ता डा. जागेश्वर गौतमले मोरङ, पर्सा, बारा, सप्तरी र सर्लाहीमा एक—एक जनाको मृत्यु भएको जानकारी दिए । 
यस्तै ललितपुर, चिवतन, मकवानपुर, दोलाखा र प्युठानमा पनि एक एक जना संक्रमितको मृत्यु भएको उनले बताए । योसँगै मृतकको संख्या १ सय ३७ पुगेको छ ।  
यसैगरी शुक्रबार ८ सय ३८ जना नयाँ संक्रमित थपिएका छन । २ सय ९२ महिला र ५ सय ४६ पुरुष गरी ८ सय ३८ जना संक्रमित थपिएका हुन । 
काठमाडौंमा मात्रै १ सय ४२, भत्तपुर १५ र ललितपुर २५ जना संक्रमित भेटिएका छन । यस्तै शुक्रबार २ सय ५० जना संक्रमित निको भएर घर फर्किएका छन । 
मन्त्रालयले हालसम्म  ५ लाख ७९ हजार ८ सय ९९ पीसीआर परीक्षण गर्दा ३ अर्ब १८ करोड ९४ लाख ४४ हजार ५ सय रुपैयाँ खर्च भएको जनाएको छ । 
प्रवक्ता डा. गौतमले पीसीइ बाहेक पीसीआर परीक्षणमा मात्रै उक्त रकम खर्च भएको हो । एउटा पीसीआर परीक्षण गर्न ५ हजार ५ सय रुपैयाँ खर्च हुने गरेको उनको भनाई छ ।