ट्राफिक हवल्दार 'काशीराम' बने बागमती प्रदेशकै उत्कृष्ट ट्राफिक

५ भदौं,हेटौँडा। बागमती प्रदेश प्रहरी कार्यालय मातहतका कार्यालयमा खटिएका प्रहरीले पदको दुरुपयोग गरी घुस रकम लिनेलाई कारवाही मात्र गरेको छैन,डयुटी रहेका समयमा इमान्दारीपुर्वक डयुटी गर्ने प्रहरीलाई सम्मान तथा पुरस्कार समेत दिदै आएको छ। 

यसै क्रममा जिल्ला ट्राफिक प्रहरी कार्यालय मकवानपुरमा कार्यरत  प्रहरी हवल्दार काशीराम थापामगर साउन महिनाको उत्कृष्ट ट्राफिक प्रहरी घोषित भई सम्मानित तथा पुरस्कृत भएका छन्।बागमती प्रदेश ट्राफिक प्रहरी कार्यालय  रामनगर चितवनले शुक्रबार थापालाई साउन महिनाको उत्कृष्ट ट्राफिक घोषित  गर्दै प्रशंसापत्रले  सम्मानित गरेको हो ।

जिल्ला ट्राफिक प्रहरी कार्यालय मकवानपुरमा कार्यरत थापाले गत साउन २६ गते हेटौंडा–११  थानाभर्याङमा मोटरसाइकललाई ठक्कर दिई फरार रहेका चालक र सहचालकमाथि अनुसन्धान गरी पक्राउ गर्न सफल भएको भन्दै पुरस्कृत गरिएको जनाइएको छ। बागमती प्रदेश ट्राफिक प्रहरी कार्यालयका प्रहरी उपरीक्षक प्रकाश रानाभाटद्वारा हस्ताक्षरित प्रशंसापत्रमा थापाले  हेटौँडा-११ मा भएको घटनाको अनुसन्धान गरी सो दूर्घटना गराई फरार रहेका ट्रकका चालक र सहचालकलाई भोलिपल्ट हेटौंडाको राप्ती खोलाको बगरबाट पक्राउ गर्न सफल भएको जसले  अपराध अनुसन्धान तथा नियन्त्रण एवम् शान्ति सुरक्षा मजबुद बनाउने, सूचनाको स्रोतको उच्चतम उपयोग गरी परिचालित भई तोकिएको जिम्मेवारी पूरा गर्नेतर्फ जागरुक, उत्सुक, संवेदनशील एवम् लगनशील भई कार्य सम्पादन गरेको भन्दै साउन महिनाको उत्कृष्ट प्रहरी घोषणा गरिएको  प्रमाणपत्रमा उल्लेख गरिएको छ ।