विद्यालयका क्यान्टिन अव्यवस्थित

५ असार, हेटौँडा । संयुक्त अनुगमन टोलीले हेटौडामा रहेको सामुदायिक र संस्थागत विद्यालयमा सोमबार अनुगमन गरिएको छ । हेटौडाको सिद्धार्थ मावि,  बाल जागृति इङ्गिलस स्कूल र रिलायन्स बोर्डिङमा अनुगमन गरिएको हो ।  

विद्यालयको क्यान्टिनको अवस्था, शौचालय, खानेपानी, सरसफाई लगायत विषयमा अनुगमन गरिएको थियो । अनुगमनको क्रममा हेटौडा–२ मा रहेको सिद्धार्थ माविको क्याटिनबाट लेभल नभएको ४० पिस सुजीको पप बरामद गरिएकोछ । बाल जागृति इङ्गिलस स्कुलको क्यान्टिनमा अव्यवस्थित ढंगले खाजा विक्रि गरिरहेको पाईएको थियो । रिलायन्सको क्यान्टिन पनि अव्यवस्थित पाईएको थियो । अनुगमनमा विद्यालयका क्याटिन फोहोर र अव्यवस्थित पाइएकाले व्यवस्थित गर्न अनुगमन टोलीले निर्देशन दिएको छ ।

जिल्ला शिक्षा कार्यालयका  प्रतिनिधि,  क्षेत्रिय खाद्य तथा गुण नियन्त्रण कार्यालयका प्रतिनिधि, खाद्य विशेषज्ञ, महिला तथा बालबाललिका कार्यालयका प्रतिनिधि, नेपाल उपभोक्ता संरक्षण समुह र संचारकर्मीको टोलिले संयूक्त रुपमा अनुगमन गरेको थियो । अन्य स्थानहरुमा पनि अनुगमनलाई निरन्तरता दिने नेपाल उपभोक्ता महिला तथा बालबालिका संरक्षण समुहकी अध्यक्ष सपना कंडेलले जानकारी दिईन् ।