गरुडाका डिएसपी महतो प्रदेश प्रहरी कार्यालय तानिए

डिएसपी महतो

१३ भदौ,चपुर। रौतहटको गरुडामा रहेको ईलाका प्रहरी कार्यालयका प्रहरी नायब उपरिक्षक ज्ञान कुमार महतो प्रदेश नम्बर २ प्रहरी कार्यालय जनकपुर  तानिएका छन्। कर्तव्य ज्यान मुद्दामा पक्राउ परेका विजय रामको मृत्यु भएपछि गरुडाका प्रहरी नायब उपरिक्षक प्रदेश प्रहरी कार्यालय तानिएका हुन । 

गरुडा नगरपालिका-८ जिगंडवाका २० वर्षीय निरन्जन रामको घाटी रेटेर हत्या गरेको अभियोगमा पक्राउ परी हिरासतमै रहेको उनको  उपचारका क्रममा विरगंज मुत्यु भएको थियो। १९ वर्षीय विजय शरीर भरी निलडाम र घाउचोट भेटेपछि स्थानीयले प्रहरीको कुटपिटका कारण मृत्यु भएको दाबी गर्दै आएका छन् । गरुडाका डीएसपी ज्ञानकुमार महतोलाई निलम्बन गरेर घटनाको छानविन गर्नुपर्ने भन्दै परिवार तथा  स्थानीयले विरोध गर्दै आएका थिए। 

यता घटनाको अनुसन्धानका लागि गृह मन्त्रालयले इलाका प्रशासन कार्यालय चन्द्रनिगाहापुरका उपसचिवको संजोजकत्वमा तीन सदस्यीय छानबिन समिति बनाएको छ । समितिमा उप-सचिव सहित  प्रदेश प्रहरी कार्यालय जनकपुरका प्रहरी  उपरिक्षक र रौतहटका अनुसन्धान कार्यालयका उपरिक्षक रहेका छन्।त्यसैगरी डीएसपी महतोलाई प्रदेश प्रहरी कार्यालयमा तानिएको र महतोको ठाँउमा तत्कालका लागि जिल्ला प्रहरी कार्यालय रौतहटका डीएसपी भरत श्रेष्ठलाई गरुडा पठाइएको छ  ।