मकवानपुरमा निषेधाज्ञाको ढाँचा फेर्न सुझाव, निर्णय हुँदै

१५ भदौं, हेटौंडा । निषेधाज्ञाको निरन्तरताबारे मकवानपुरमा प्रश्न उठिरहेको बेला जिल्ला प्रशासन कार्यालय मकवानपुरले यसमा सामान्य परिवर्तन गर्ने तयारी गरेको छ । 
जिल्ला कोभिड १९ संकट व्यवस्थापन केन्द्रको बैठकमा पनि निषेधाज्ञाको ढाँचा फर्न सुझाव आईरहेकोले प्रशासनले यसबारे तयारी गरेको हो । थप गरेको निषेधाज्ञाको अवधी सोमबार राति १२ बजेबाट सकिंदैछ । सोमबार जिल्ला प्रशासन कार्यालयमा बस्ने बैठकले यसबारे निर्णय गर्ने भएको हो । स्रोतका अनुसार सवारी साधनको आवतजावतमा गरिएको रोकलाई निरन्तरता दिंदै व्यापार व्यवसाय संचालनमा केही खुकुलो रणनीति अपनाउन चौतर्फी सुझाव गएको छ । 
‘सोमबारको बैठकले व्यवसाय संचालन र बैंक तथा वित्तिय संस्था संचालनबारे केही निर्णय गर्ने अपेक्षा छ ।’–कोभिड १९ संकट व्यवस्थापन केन्द्रका एक सदस्यले भने । उनका अनुसार केही बाहेक अन्य व्यवसाय संचालन गर्न दिन र अहिलेको किनमेलको विहान ८ बजेसम्मको समय केही थप्नुपर्ने सुझाव आएको छ । त्यस्तै, बैंक तथा वित्तिय संस्थालाई सर्तसहित संचालन गर्न दिनुपर्नेबारे पनि सुझाव आएको छ ।
सुझावका आधारमा प्रशासनले भने यसबारेमा सार्वजनिक धारणा राखेको छैन । केहीले भने निषेधाज्ञा खुकुलो गरे कोरोना संक्रमण बढ्ने भएकाले निरन्तरता दिनुपर्ने सुझाव समेत दिंदै आएका छन् ।