बानियाँले भने–‘यस्तै रहे जनताले निषेधाज्ञा तोड्छन्’

File Photo

१५ भदौ, हेटौंडा । नेपाली कांग्रेस बागमती प्रदेश संसदीय दलका नेता एवं मकवानपुर सभापति इन्द्रबहादुर बानियाँले अहिलेकै अवस्था रही रहने हो भने जनताले निषेधाज्ञा तोड्ने बताएका छन् ।
नेपाली रेडियो नेटवर्कको अन्तरवार्तामा उनले कोरोनाको जोखिम व्यवस्थापन गर्न नसकेको वर्तमान सरकारले लकडाउन र निषेधाज्ञा मात्रै गर्न जानेको बताए । निषेधाज्ञा निरन्तर बढाई जनतालाई थुनेर राख्ने र आफु चै भ्रष्टाचारमा लिप्त हुने अवस्थाले सरकारप्रति जनताको आक्रोश बढेको उनको भनाई छ । उनले यो सरकारले निषेधाज्ञालाई निरन्तरता दिईरहेर मुलुकको अर्थतन्त्र र जनजीवन तहसनहस गराउने काम गरिरहेको बताए । 
उनले भने–‘मजदुरले काम गर्न नपाएपछि कहाँबाट खाने ? राज्यको मानवीय संवेदनशिलता खै यो अवस्थामा ? यदि सरकारले राम्रो व्यवस्था गरेन भने जनताले निषेधाज्ञा तोड्छन्, निषेधाज्ञा जरुरी छ छैन भन्ने समयले देखाउँछ, खाली जबरजस्ती निषेधाज्ञामात्रै गरेर हुन्छ ?’ उनले कोरोना नियन्त्रणका लागि पिसिआर परीक्षणको दायरा बढाउन, आईसोलेसन र क्वारेन्टाईनको संख्या बढाउँदै उपयुक्त व्यवस्थापन गर्न र जनजीवन सहज बनाउनेतर्फ अघि बढ्न सरकारलाई सुझाव दिए । 
कांग्रेस जिम्मेवार दल भएकाले मानवीय संवेदनशिलताको विषयमा सरकारलाई सहयोग गरिरहेको र गर्न तयार रहेको बताउँदै उनले विरोध गर्नकै लागि कांग्रेसले अहिलेको अवस्थामा सडकमा जुलुस ननिकाल्ने प्रष्ट पारे । यसलाई सरकारले कमजोरी ठान्न नहुने उनको भनाई छ । उनले कांग्रेससहित सबै दलले कोरोना नियन्त्रणका लागि सबै खाले सहयोग गर्ने प्रतिवद्धता जनाउँदा समेत सरकार कमाउ धन्दामा व्यस्त रहेकाले जनताले प्रतिकार गर्ने अवस्था आईसकेको बताए ।