अवैध उत्खनन रोक्दा बागमतीमा जनप्रतिनिधिले हातपात गरेको भन्दै कारवाहीको माग

१५ भदौ, हेटौंडा । खोलामा भईरहेको उत्खनन रोक्न खोज्दा मकवानपुरको बागमती गाउँपालिकाका एक वडा अध्यक्षले हातपात गरेको भन्दै कारवाहीको माग गरिएको छ ।
वन क्षेत्रमा पर्ने ढुंग्रेखोलाबाट भएको उत्खनन रोक्न खोज्दा बागमती गाउँपालिका ४ नम्बर वडाका अध्यक्ष रहरसिं थिङसहितले स्थानीय लालिगुराँस सामुदायिक वन समूहका अध्यक्ष सूर्यचन्द्र लोप्चनसहित उपभोक्तामाथि हातपात गरेको भन्दै कारवाहीको माग गरिएको हो । सामुदायिक वन समूहको कार्ययोजना विपरित आफ्नो क्षेत्रमा आइतबार अपरान्ह झुरझुरेदेखि राईगाउँसम्मको सडक निर्माणका लागि विना जानकारी ढुंगा, गिटि, बालुवा निकाली प्रयोग गरेकोमा रोक्न खोज्दा आफुहरुमाथि हातपात भएको भन्दै प्रहरी चौकी झुरझुरेमा घटनामा संलग्नलाई कारवाहीको माग गरिएको छ । 
वन समूहका अध्यक्ष र उपभोक्तालाई वडा अध्यक्ष थिङ, गाउँपालिकाका इन्जिनियर दिनेश बानियाँ, मुक्ति लामा, सुर्दशन गोले, मनोज बलसहितले गालिगलौज र हातपात गरेको वन समूहको विज्ञप्ति र निर्णयमा उल्लेख छ । वन समूहको बैठकले आगामी दिनमा त्यस क्षेत्रबाट हुने उत्खनन रोक्नका लागि पनि प्रहरी र डिभिजन वन कार्यालय मकवानपुरसंग अनुरोध गर्ने निर्णय गरेको छ ।
वन समूहका उपभोक्ताले जनप्रतिनिधिले समन्वयमा काम गर्नुपर्नेमा दादागिरी शैलीमा वन समूहको क्षेत्रभित्र अवैध उत्खनन गरेको भन्दै घटनाका दोषिलाई कारवाही हुनुपर्ने माग गरेका छन् ।