अरुलाई दुरी कायम गर्न भन्ने, आफु टाँसिएर फोटो खिचाउने

१५ भदौ, हेटौंडा । बागमती प्रदेशभर कोरोना संक्रमणको जोखिम बढिरहेको छ । सरकारले कोरोनाको जोखिम रोक्न मास्क प्रयोग गर्न, भौतिक दुरी कायम गर्न र भिडभाड नगर्न सर्वसाधारणलाई आग्रह गर्दै आएको छ ।
प्रदेशका कतिपय जिल्लाका विभिन्न स्थानीय तहमा निषेधाज्ञासहितका कडाईका उपाय अवलम्बन गर्दै कोरोनाको जोखिम रोक्ने प्रयास भईरहेको छ । तर सर्वसाधारणलाई घरभित्र बस्न, अनावश्यक हिडडुल नगर्न, मास्क प्रयोग गर्न र भौतिक दुरी कायम गर्न सुझाव दिने बागमती प्रदेश सरकारका मूख्यमन्त्रीदेखि मन्त्रीसम्म कार्यक्रम गर्दै टाँसिएर फोटो खिचाईरहेका छन् । बागमती प्रदेशका प्रमुख सचिव मानबहादुर विके, प्रदेश नीति तथा योजना आयोगका कार्यवाहक अध्यक्ष श्याम बस्नेतसहितका पदाधिकारी बिना मास्क कार्यक्रममा उपस्थित भएका छन् ।
यो दृष्य अन्त कतै नभई मदन भण्डारी स्वास्थ बिज्ञान प्रतिष्ठान हेटौंडामा नियुक्त भएका पदाधिकारीहरुको सोमबार हेटौंडामा भएको सपथग्रहण कार्यक्रमको हो । स्वास्थ्य क्षेत्रका हस्तिहरुको सपथग्रहण कार्यक्रममा उनीहरुले नै कोरोनाविरुद्धको स्वास्थ्य मापदण्ड पालना गरेका छैनन् । कार्यक्रममा रजिस्ट्रारमा राजेश प्रसाईं, निर्देशक डा. हरिबहादुर खड्का र संयोजकमा चिरञ्जीवी चुडालले ४ बर्षे कार्यकालका लागि सपथ लिएका छन् । सपथग्रहणपछिको फोटोसेसन रोचक छ । मूख्यमन्त्री डोरमणी पौडेल, सामाजिक विकास मन्त्री युवराज दुलाल, भौतिक पूर्वाधार विकास मन्त्री रामेश्वर फुँयाल, उद्योग, पर्यटन, वन तथा वातावरण मन्त्री अरुण नेपालसहित सबैजना टाँसिएर बसेका छन् ।  फोटोमा मूख्यमन्त्रीकै राजनैतिक सल्लाहकार जेएन थपलियादेखि कतिपयले मास्क चिउडोमा लगाएका छन् त कतिपयले हातमा लिएका छन् ।
यसले सरकारका जिम्मेवार व्यक्तिको ‘अरुलाई दुरी कायम गर्न भन्ने, आफु टाँसिएर फोटो खिचाउने’ प्रवृत्तिलाई छर्लङ्ग पारेको छ । उसो त पार्टी प्रवेश कार्यक्रम गरेर सामुहिक फोटो सेसन गरेको बागमती प्रदेश प्रमुख प्रतिपक्षी दलका नेता इन्द्रबहादुर बानियाँको तस्विरको पनि केही दिनअघि आलोचना भएको थियो । सर्वसाधारणले सरकारका जिम्मेवार पदाधिकारीदेखि नेतासम्मले अरुलाई भन्ने तर आफु उल्लंघन गर्ने प्रवृत्ति देखाएको भन्दै आलोचना गरिरहेका छन् । उनीहरुले सर्वधारणका लागि मात्रै ऐनको प्रवृत्ति अन्त्य हुनुपर्ने आवाज उठाईरहेका छन् ।