मकवानपुरमा स्वास्थ्य विमा गरिदै

८ असार, हेटौँडा । सरकारले मकवानपुरमा पनि स्वास्थ्य विमा कार्यक्रम शुरु गर्न लागेको छ । विमाका लागि गठन भएको सामाजिक स्वास्थ्य सुरक्षा विकास समितिले विहिबार अन्तरक्रिया गर्दै यस्तो जानकारी दिएको हो ।

मकवानपुरमा असार १५ गतेबाट स्वास्थ्य विमा कार्यक्रम शुरु हुँदैछ । जिल्लाका १ सय २ वडाका लागि १ सय २८ दर्ता सहयोगी भर्ना गरिएका छन् । ति कर्मचारीलाई पहिलो चरणमा असार ९ देखि ११ गतेसम्म ६६ जना र १२ देखि १४ सम्म ६२ जनालाई तालिम दिईने भएको छ । समितिका कार्यक्रम निर्देशक डा. गुणराज लोहनीका अनुसार ५ जना सदस्य रहेको परिवारले २५ सय रुपैँयामा विमा गर्न सक्ने र थप सदस्यका लागि ४ सय २५ रुपैँयाका दरले भुक्तानी गर्नुपर्ने हुन्छ । विमा गरेपछि एक बर्षमा विमा गरेका परिवारका सदस्यहरुले ५० हजार रुपैँया बराबरको उपचार सेवा प्राप्त गर्ने छन् । सिमान्तकृत र विपन्न बर्गको विमा रकम भने राज्यले नै भुक्तनी दिने तयारी गरिरहेको उनले बताए । उपचारका लागि पहिलो छनौट सरकारी स्वास्थ्य संस्था हुनुपर्ने र अन्यत्र उपचार गर्नुपर्ने ति संस्थाले रिफर गर्ने व्यवस्था मिलाएको लोहनीको भनाई छ ।

२०७२ चैतबाट कैलालीबाट शुरु भएको स्वास्थ्य विमा आछाम, बाग्लुङ, बर्दिया, कैलाली, कास्की, पाल्पा, म्याग्दी र इलाममा लागु भईसकेको छ । लागु भएका ८ जिल्लामा जेठसम्ममा ८४ हजार जनाले विमा गरेका छन् । यसबाट ४ करोड २० लाख रुपैँया जम्मान भएको छ । यो अवधिमा २५.४ प्रतिशत सदस्यले उपचार सेवा लिएका छन् र १ करोड ११ लाख ३५ हजार एक सय ५२ रुपैँया सम्बन्धित स्वास्थ्य संस्थामा दावि भुक्तानी दिएको निर्देशक लोहनीले बताए ।

यसअघि विमा कार्यक्रम लागु भएकासंगै असार १ गतेबाट जुम्ला तनहुँ, चितवन र भरतपुरमा पनि विमा कार्यक्रम विस्तार भएको छ भने असार १५ गतेबाट मकवानपुर, जाजरकोट र गोरखामा सेवा शुरु हुँदैछ । जिल्लाका सरोकारवालाहरुका लागि गरिएको अभिमुखीकरण कार्यक्रममा हेटौँडा उपमहानगरपालिकाकी उपमेयर मिना लामा, सह क्षेत्रीय प्रशासक कुमारबहादुर खड्का, प्रमुख जिल्ला अधिकारी नारायणप्रसाद शर्मा दुवाडी, क्षेत्रीय स्वास्थ्य निर्देशक डा. बासुदेव पाण्डे लगायतले मन्तव्य व्यक्त गरेका थिए ।