एमडीको शुल्क ३१ लाख

८ असार, काठमाडौं । त्रिभुवन विश्वविद्यायलले चिकित्सा शिक्षा तर्फको स्नातकोत्तर तहको शुल्क ३१ लाख रुपैयाँ निर्धारण गरेको छ । यसअघि एक करोडसम्म शुल्क लिएको गुनासो आएपछि शिक्षा मन्त्रालय र सर्वोच्च अदालत शुल्क निर्धारण गर्न आदेश दिएपछि त्रिविले बाध्य भएर शुल्क निर्धारण गरेको हो ।

त्रिवि कार्यकारी परिषद्को बुधबार बसेको बैठकले तीन वर्षे एमडी, एसम र एमडीएसको शुल्क ३० लाख ९९ हजार ३ सय ९६ रुपैयाँ निर्धारण गरेको छ । त्यस्तै बेसिक साइन्स र फरेन्सिक मेडिसिन तर्फ १२ लाख शुल्क निर्धारण गरेको छ । दुई वर्षे एमपीएच, एमपीएई, एमपीएचएन र एमएनको शुल्क १० लाख ९१ हजार, तीन वर्षे एसएससी क्लिनिकल माइक्रोबाइलोजी/बायोकेमेस्ट्रीको १२ लाख ५३ हजार रुपैयाँ शुल्क निर्धारण गरेको छ । 

निर्धारण गरिएको शुल्क तिरेपछि विद्यार्थीलाई निर्वाह भत्ता समेत कलेजले दिनुपर्ने हुन्छ । त्रिविले निर्वाह भत्ता कति दिने भन्ने तोकेको छैन । काठमाडौं विश्वविद्यालयमा २२ लाख ५० हजार शुल्क बुझाएपछि ७ लाख २० हजार रुपैयाँ विद्यार्थीलाई निर्वाह भत्ता बापत फिर्ता दिने व्यवस्था छ । चिकित्सा शास्त्र अध्ययन संस्थान (आइओएम) ले सम्बन्धन प्राप्त नीजि मेडिकल कलेज र डेण्टल कलेजहरुलाई निर्धारित शुल्क लिन सूचना जारी गरेको छ ।