महामारी साझा समस्या, सरकार र निजी क्षेत्र मिलेर लड्नुपर्छः प्रधानमन्त्री

२२ भदौ, हेटौंडा । प्रधानमन्त्री केपी शर्मा ओलीले कोरोना विरुद्धको अभियानमा सरकार र निजी क्षेत्र सँगै मिलेर अघि बढ्नुपर्ने बताएका छन् ।
आइतबार साँझ बालुवाटारमा निजी क्षेत्रका प्रतिनिधिहरुसँग भएको छलफलमा प्रधानन्त्री ओलीले कोरोनाविरुद्ध सरकार एक्लैले लड्न नसक्ने बताउँदै निजी क्षेत्रको पनि सहयोग आवस्यक रहेको बताएका हुन् ।
उक्त अवसरमा प्रधानमन्त्री ओलीले कोरोनाको महामारीले ठप्प भएको अर्थतन्त्रलाई चलायमान बनाउन निजी क्षेत्र र सरकार मिलेर अघि बढ्नुपनेमा जोड दिए । उनले कोरोना महामारीले निम्त्याएको समस्या सरकार एक्लैको नभई साझा समस्या भएको उल्लेख गरे ।
प्रधानमन्त्री ओलीले यसमा सरकार कोरोनाको संक्रमण नियन्त्रण गर्न र अर्थतन्त्र विनाशमा जानबाट जोगाउन सन्तुलन कायम गरी अघि बढ्न प्रयत्नशील रहेको दावी गरे ।
छलफललाई प्रधानमन्त्री ओलीले सकारात्मक रुपमा लिएको र मिलेर अघि बढ्न आग्रह गरेको उद्योग वाणिज्य महासंघकी अध्यक्ष भवानी राणाले बताईन । प्रधानमन्त्रीसँगको छलफल फलदायी हुनेमा आफुहरु बिस्वस्त रहेको उनको भनाई थियो ।
प्रधानमन्त्री ओलीले नेपाल उद्योग वाणिज्य महासंघ, नेपाल उद्योग परिसंघ र नेपाल चेम्बर अफ कमर्सका प्रतिनिधिसँग छलफल गरेका थिए ।