गाउँलेले गरे सडकमै रोपाई (भिडियोसहित)

१० असार, हेटौँडा । असारमा आफ्नो खेतको रोपाईमा व्यस्त हुनुपर्ने हेटौँडा–१७ राजदेवीका किसानले शनिबार सडकमै रोपाई गरेका छन् ।
सवारीसाधन गुडिरहेको ग्राभेल सडकमा ठेकेदार कम्पनीले माटो हालेर हिलाम्मे बनाई दिएपछि उनीहरुले सडकमै रोपाई गरेका हुन् । सडक विस्तार गर्ने भन्दै ठेकेदारले असारको पहिलो साता राजदेवीदेखि दोभानचौरसम्मको ४ किलोमिटर क्षेत्रमा रातो माटो विछ्याएको छ । बर्षायाममा रातोमाटो विछ्याएकाले सडक हिलाम्मे भई यातायात ठप्प भएको स्थानीय डेकराज धमलाले बताए । ‘असारमा रातो माटो हालेर हिलाम्मे भएपनि विरामी ल्याउन एम्बुलेन्स समेत नचल्ने अवस्था छ, प्रशासनको ध्यान ज्याओस् र काम राम्रो होस् भन्ने हाम्रो भनाई छ ।’–स्थानीय कृष्णप्रसाद सञ्जेलले भने ।
चुनडाँडादेखि दोभानचौरसम्मको सडक विस्तारका लागि ५ करोडको ठेक्का सिंह एण्ड ब्रर्दशले पाएको थियो । स्थानीयले मंसिरदेखि नै सडक विस्तारका लागि खेति गर्ने खेत खालि राखेपनि बर्षामा माटो विछ्याएर हिलाम्मे पारेपछि उनीहरु आक्रोशित भएका छन् । असार मसान्तमा भुक्तानी लिने उद्देश्यले काम गरेको भन्दै गुणस्तरीय काम नभएसम्म ठेकेदारलाई भुक्तानी दिन नहुने स्थानीय खानीमाया गुरुङको भनाई छ ।
सडक विस्तारका क्रममा ढलको व्यवस्था नहुँदा धेरैको घरभित्र पानी जमेर आहाल बनेको छ । सदरमुकाम हेटौँडाबाट पूर्वी क्षेत्रको ग्रामिण भेगसम्म जाने सडक अवरुद्ध हुँदा यस क्षेत्रका दुग्धजन्य उत्पादन बजार पुर्‍याउन, विद्यार्थीलाई विद्यालय आउन र एम्बुलेन्स समेत संचालन हुन समस्या परेको भन्दै समाधानका लागि प्रशासन र जनप्रतिनिधिहरुसंग उनीहरुले आग्रह गरेका छन् ।