‘नमस्ते काठमान्डु’ सार्वजनिक

सुनिल शिवाकोटी

१० असार, हेटौँडा । चलिचित्र निर्देशक एवं वरिष्ठ चलचित्र पत्रकार डब्बु क्षत्रीद्वारा यौन बिषयबस्तुमा  लिखीत  कथा संग्रह ‘नमस्ते काठमान्डु’  हेटौंडामा सार्वजनिक गरिएको छ ।

चलचित्र विकास वोर्डका सदस्य नरेन्द्र महर्जन तथा नेपाल पत्रकार महासंघ मकवानपुरका अध्यक्ष हरि हुमागाइले संयुक्त रुपमा पुस्तक सार्वजनिक गरेका हुन् । चलचित्र पत्रकार संघ मकवानपुरले आयोजना गरेको सार्वजनिक तथा अन्तरक्रिया कार्यक्रममा नेपाल पत्रकार महासंघ मकवानपुरका अध्यक्ष हरि हुमागाईले २१औं शताब्दीमा  यौनका कुरा पढन नेपाली समाजमा कुना पस्नु पर्ने अवस्थालाई  यस कथा संग्रहको प्रकाशनले यौनका कुरालाई समेटी यस्तो अवस्थाको अन्त्य हुने अपेक्षा गरे । 

त्यसैगरी चलचित्र विकास वोर्डका सदस्य नरेन्द्र महर्जनले यस पुस्तक सबैको रुचिको बिषय बन्नेमा विश्वास ब्यक्त गरे । पत्रकारहरुसंगको अन्तरक्रियामा लेखक क्षत्रीले पुस्तक मनोविज्ञानमा आधारित र यौन विद्रोहको विषयमा लेखिएकोले पुस्तकबाट पाठकहरूले यौनका विषयमा जानकारी पाउने कुरा व्यक्त गरे ।  

चलचित्र पत्रकार संघ मकवानपुरका अध्यक्ष मणिराज गौतमको सभाध्यक्षतामा सम्पन्न कार्यक्रममा नेपाल पत्रकार महासंघ मकवानपुरका उपाध्यक्ष कुमार अधिकारी, पव्लिकेशनका पुष्पराज पौडेल लगायतको  सहभागिता रहेको थियो ।

शिखा बुक्सले प्रकाशित तथा  ज्ञानज्योति बुक्स पब्लिकेसनले वितरणको जिम्मा लिएको पुस्तकको मूल्य २४० तोकिएको छ ।