आज विश्वकर्मा पूजा, मेसिन तथा फलामको पुजा गरी मनाईदैं

file photo

१ असोज, हेटौंडा । आज असोज १ गते अर्थात आश्विन संक्रान्तिका दिन कालीगढहरुले विश्वकर्माको पूजाआजा गरी विश्वकर्मा दिवस मनाइदैछ । 
आजको दिनमा देशभरका उद्योग कलकारखानाका मेसिन तथा फलामको पुजा गरी विश्वकर्मा पुजा मनाईदै छ । 
विशेष गरी धातुबाट बनेका उपकरण चलाउने मजदुरहरुले आजको दिन धुमधामसंग पुजाआजा गरी विश्वकर्मा पुजा मनाउने प्रचलन छ । आज कलकारखानामा रंगीचंगी पार्नुका साथै बिशेष पूजा पनि गरिन्छ । 
सवारी साधन हुनेहरूले बिहानै सवारी साधनलाई धोएर पूजाआजा गर्ने गरिन्छ । गाडी मर्मत संभार गर्ने ग्यारेजलगायत हरेक सानाठूला उद्योग कलकारखानामा आज सामानको दिगोपन र मुनाफाको कामना गर्दै पूजा गर्ने गरिन्छ । 
पूजा गरिसकेपछि दिनभर ती सामानको प्रयोग नगर्ने प्रचलन पनि छ । यस अवसरमा केही स्थानहरुमा विश्वकर्माको मूर्ति बनाई पूजा गर्ने र प्रसाद चढाउने चलन पनि छ । 
आज पूजा गरिएको मूर्तिलाई भोलिपल्ट बिहान नजिकैको खोला वा नदीमा लगि बिसर्जन गरेपछि विश्विकर्मा पूजा समापन हुन्छ । 
तर यसबर्ष गत चैत ११ गतेदेखि नै धेरैजसो उद्योग कलकारखाना तथा सवारी साधनहरु बन्द छन् । खुला भएकामा पनि थोरै जनशक्तिले मात्र भौतिक दूरी कायम गरी काम गरिरहेका छन् । 
आजका दिन कालीगढले उपयोगमा ल्याउने विभिन्न औजारका सामानमा पूजाआराधना गरेमा धेरै समय टिक्ने, कामका बेलामा नबिग्रने र राम्रो काम गर्न सकिनेलगायत गुण प्राप्त हुने धार्मिक विश्वास छ ।
द्वापर युगमा भगवान् कृष्णलाई राक्षसहरुले दुःख दिएपछि विश्वकर्माले समुद्रका बीचमा ‘भेद द्वारका’ बनाई लुकाएको धार्मिक विश्वास छ । 
एकै रातमा समुद्रका बीचमा ‘भेद द्वारका’ को निर्माण गरेकाले विश्वकर्मालाई सफल वास्तुविद्का रुपमा मानी त्यसै समयदेखि पूजाआजा गर्ने परम्परा बसेको विश्वास गरिन्छ ।