५० प्रतिशत दुर्व्यसन साथीभाईको लहलहैमा

१२ असार, हेटौँडा । लागुऔषधको सेवनमा विभिन्न कारण हुने गरेकोमा ५० प्रतिशत दुर्व्यसनको शुरुवात साथीभाईको लहलहैमा हुने गरेको छ ।
मकवानपुरका प्रहरी उपरीक्षक बसन्त लामाका अनुसार लागुऔषध सेवनकर्तामध्ये ५० प्रतिशत साथी भाईको आग्रहमा लागुऔषधको सेवन शुरु गरेको पाईएको छ । ‘साथीभाईले एक पटक त हो नि भन्दै सेवनका लागि उक्साउने गरेको पाईएको छ ।’–लामाले एक प्रस्तुतिका क्रममा भने ।

प्रहरीका अनुसार विभिन्न खाले समस्याका समाधानका लागि भन्दै लागुऔषध सेवन गर्नेको संख्या २० प्रतिशत रहेको छ भने पारिवारिक विखण्डनका कारण १० प्रशितले लागुऔषध सेवन गर्ने गरेको पाईएको छ । त्यस्तै १० प्रतिशत प्रयोगकर्ताले नयाँ स्वाद चाख्ने चाहनाका कारण लागुऔषध सेवनको कुलतमा फस्ने गरेको पाईएको लामाको भनाई छ । चुरोट, सूर्ति, रक्सी, गुट्खा लगायतका सागम्रीलाई समाजले लागुऔषधको रुपमा नलिएको बताउँदै गृहमन्त्रालयका सहसचिव केदार न्यौपानेले यो नै लागुऔषध दुर्व्यसनतर्फ लाग्ने पहिलो पाईला भएको बताए ।

दुर्व्यसनमा फसेपछि पारिवारिक तनाव, आर्थिक क्षति र प्रयोगकर्ताको स्वास्थ्यमा समेत गम्भिर असर पर्ने गरेको छ । लागुऔषध दुर्व्यसन नियन्त्रणका लागि चेतना अभिबृद्धिको कार्यक्रम संचालन, अभिभावकबाट सन्तानको सही हेरचाह, जागरुक समाजको निर्माण, प्रहरीको कडा निगरानी लगायतका काममा जोड दिनुपर्ने सरोकारवालाहरुको भनाई छ ।