नेवारपानी दुर्घटना : कोरोना भएपछि होम आईसोलेसनमा बस्न जाँदै गर्दा मृत्यु

सांकेतिक तस्विर

३ असोज, हेटौंडा । पूर्वपश्चिम राजमार्ग अन्तरगत  हेटौंडा–१९ नेवारपानी नजिक सवारी दुर्घटनामा मृत्यु भएका युवक कोरोना संक्रमित भएपछि होम आइसोलेसनमा जाँदै गरेको खुलेको छ । नेवारपानी र मनहरी–९ रजैयाको सिमानामा बसको ठक्करबाट मृत्यु भएका चितवन भरतपुर–७ का २९ बर्षीय दिपेन्द्र अधिकारी संक्रमण पुष्टी भएपछि घरमै आइसोलेसनमा बस्न जाँदै गरेको खुलेको हो ।
शुक्रबार साँझ सार्वजनिक रिपोर्टमा कोरोना पुष्टी भएका उनी बकैया गाउँपालिकाका सव-इन्जिनियर रहेको गाउँपालिकाका अध्यक्ष दामोदर खनालले प्रष्टखबरलाई जानकारी दिए । ‘शुक्रबार साँझ कोरोना पुष्टी भएपछि घरमा छुट्टै बस्न सबै व्यवस्था राम्रो छ, उतै जान्छु भन्दै हुनुहुन्थ्यो ।’– खनालले भने–‘एम्बुलेन्सको व्यवस्था गर्छौ भनेका थियौं तर मोटरसाइकलमा एक्लै निस्कनु भएछ ।’ मोटरसाइकलमा जाँदा कसैलाई नछुने र घर सुरक्षित ढंगले बस्ने सोचका साथ उनी हिडेको जनाईएको छ । दुर्घटनाबारे जानकारी आएपछि खनालसहितको टोली हेटौंडा–११ स्थित चुरेहिल अस्पताल पुगेको छ ।
चितवनबाट हेटौंडातर्फ आउँदै गरेको बा ३ ख ९६६४ नम्बरको मिनि बस र हेटौंडाबाट चितवनतर्फ जाँदै ना४९प २४०० नम्बरको अधिकारीले चलाएको मोटरसाइकल ठक्कर खाएको प्रहरीले जनाएको छ । उनको उपचारका लागि हेटौंडा ल्याउँदै गर्दा मृत्यु भएको जिल्ला प्रहरी कार्यालय मकवानपुरका प्रहरी नायव उपरीक्षक इन्द्रबहादुर रानाले जानकारी दिए ।

यो पनि पढ्नुस्
हेटौंडाको नेवारपानी नजिक दुर्घटना, एक जनाको मृत्यु